කුණු ගොඩවල්, වගුරුබිම් තියෙන ඉඩම්වල ගෙවල් හදන්නෙ බලාගෙන
ජනගහනයේ සීඝ්‍ර වර්ධනය හේතුවෙන් පවුල් සංඛ්‍යාව වැඩි වීම නිසා ඉඩම් කොටස්වලට කැඩී යෑම මෙන්ම ඉඩම්වල මිල ගණන්ද අධික ලෙස ඉහළ යෑම නිසා නිවෙසක් ඉදිකර ගැනීම වෙනුවෙන් ඉඩමක් තෝරා ගැනීම අසීරු කටයුත්තක් බවට පත්වී තිබේ. කරුණු එසේ වුවත් නිවෙසක අවශ්‍යතාව මතුවන බැවින්ද නිවෙසකින් අප බලාපොරොත්තු වන්නේ සතුටින්, සාමයෙන්, නිරෝගිමත්ව සාර්ථක ජීවිතයක් ගත කිරීම හෙයින්ද නිවෙසක් ඉදිකිරීම සඳහා ඉඩමක් තෝරා ගැනීමේදී ප්‍රායෝගික, නීතිමය කරණා මෙන්ම වාස්තුමය කාරණා සම්බන්ධයෙන්ද විශේෂ සැලකිල්ලක් දැක්විය යුතුය.
වර්තමානයේ අප බොහෝ විට උත්සාහ කරන්නේ ගමෙන් නගරයට යෑමටයි. දරුවන්ගේ අධ්‍යාපන කටයුතු සේම රැකියා කරන අයගේ පහසුුව මෙන්ම අනෙකුත් අවශ්‍යතාවන් සපුරා ගැනීමේ පහසුව සලකා නගරාසන්නව නිවාස ඉදිකර පදිංචි වීමට උත්සාහ ගනී. විශේෂයෙන් නගර ආසන්නව ඉඩම්වල ප්‍රමාණය පර්. 06, 07, 08 වැනි කුඩා කොටස්වලට බෙදී ඇති බව පෙනෙන්නට තිබේ. ඒ වගේම විශාල ඉඩම් කොටස් කර විකිණීමේදී අවශ්‍යතාවන් සපුරාලීම සඳහා ඉඩමේ වපසරිය ඊට අනුකූල ලෙස කොටස් කිරීමේදී විවිධ හැඩතලයන්ගෙන් යුක්ත ඉඩම් කොටස් කිරීම දක්නට ලැබේ. කරුණු එසේ හෙයින් සාම්ප්‍රදායික වාස්තු ශීල්පීය අවශ්‍යතාවන්ට ගැළපෙන ඉඩම් කොටසක් තෝරා ගත හැක්කේ කලාතුරකිනි. එසේ වුවත් යටිතල පහසුකම්වලට පමණක් මූලිකත්වය දෙමින් ඉඩම් තෝරාගැනීමෙන් පසුව පසුකාලීනව සමාජීය, ප්‍රායෝගික, සෞඛ්‍ය ගැටලු රැසකට මුහුණපෑමට සිදුවේ. එම නිසා නිවෙසක් සඳහා ඉඩමක් තෝරා ගැනීමේදී පහත කරුණු වෙත අවධානය යොමු කළ යුතුය.
උතුර, නැඟෙනහිර, දකුණ, බටහිර ප්‍රධාන දිශාවන්ට දිශාගත වූ නිවාසවල ශක්ති ප්‍රවාහයන්ගේ බලපෑම යහපත් වන බැවින් ප්‍රධාන දිශාවන්ට යම් ප්‍රමාණයකට ආනතියකින් නිවෙසක් ඉදිකිරිමට හැකි ඉඩමක් තෝරාගැනීම යහපත් වේ. එසේම නිවෙසක් සම්බන්ධ ශක්ති ප්‍රවේශනය නිවෙස ඉදිකරන භූමියේ බෑවුම අනුවද අඩු – වැඩි වීමක් දක්නට ලැබෙන බැවින් ශක්ති ප්‍රවාහයන්ගේ දිශාවන් වන උතුර, ඊසාන, නැඟෙනහිර දිශාවන්ට භූමියේ බෑවුම සහිත දකුණ, නිරිත, බස්නාහිර දිශාවන්ට උස් පිහිටීමක් සහිත ඉඩමකට ලැබෙන අන්තරික්ෂ ශක්ති ප්‍රවාහයේ වැඩි වීම නිසා පොළොවෙන් ඉහළ නඟින භූ ශක්ති ප්‍රමාණයද ඉහළ යයි. එවැනි පිහිටීමක් සහිත භූමිය නිවෙසක් ඉදිකිරීමට ඉතාමත් යෝග්‍ය වේ.
එමෙන්ම ඉඩමේ නිවෙස ඉදිකරන ස්ථානය අනුවද නිවෙසේ අන්තරික්ෂ ශක්ති තීව්‍රතාව කෙරෙහි යම් බලපෑමක් සිදුවන බැවින් හැකිතාක් වැඩි ඉඩකඩක් ඊසාන, උතුර, නැඟෙනහිර දිශාවන්ට තබා නිවෙසක් ඉදිකිරීමට හැකිවන සේ ඉඩමක් තෝරාගැනීම ඉතාම වැදගත්ය. නමුත් මෙහිදී විශේෂයෙන් සැලකිය යුතු කාරණය වන්නේ එම දිශාවන්හි විදුලි ට්‍රාන්ස්ෆෝමර්, සන්නිවේදන කුලුනු, වගුරු බිම්, ජලය පල් වූ ස්ථාන, විශාල කළුගල්, අළුහුනු පෝරනු, කුණු කසළ ගොඩගසන ස්ථාන ඇති දැයි අවධානය යොමුු කළ යුතුය. එවැනි පිහිටීම් ඇති නම් නිවෙසට ලැබෙන අන්තරික්ෂ ශක්තියට බාධාවක් මෙන්ම ශක්තිය වියවුලකට පත්වීමද වැළක්විය නොහැකිය.
තවද නිවෙසක භූ ශක්තිය නිවැසියන්ගේ ලෞකික ආශාවන් සන්තර්පනය කරන ප්‍රභාමණ්ඩලයේ පහළ චක්‍ර බලවත් කිරීමට ඉතා වැදගත් වේ. එම නිසා නිවෙස ඉදිකරන භූමියෙහි පසේ සංයුතිය ගැන සැලකිල්ලක් දැක්විය යුතුය. මන්ද පස්වල සංයුතිය, ස්වභාවය භූ ශක්තිය කෙරෙහි අතිශය බලපෑමක් සිදුකරන බැවිනි. එම නිසා වගුරු බිම්, කුණු කසළ, ගොඩනැඟිලි කැබලි දමා පුරවන ලද කළුගල් සහිත ඉඩම් තෝරා ගැනීම ගැන දෙවරක් සිතිය යුතුය. මෙවැනි ඉඩම්වල වැසිකිළි වළක් හෝ ළි¼දක් කපා ගැනීමද අපහසු වන අතර අත්තිවාරම් දැමීමේදීද වැඩි මුදලක් වැය කිරීමටද සිදුවේ.
විශේෂයෙන් ඉඩමක් තෝරා ගැනීමේදී භූ ව්‍යාධි තත්ත්වයන් ගැනද සලකා බැලිය යුතුය. අපට නොපෙනෙන පොළොව අභ්‍යන්තරයේ භූගත ප්‍රතික්‍රියාවන් ගණනාවක් සිදුවේ. එහි ප්‍රතිඵලයක් වශයෙන් පොළොව මතුපිටට අහිතකර විකිරණ ශක්තීන් ජනනය වේ. එවැනි ස්ථානයන් නිවෙසක් තැනීමට කිසිසේත්ම යෝග්‍ය නොවේ. භූ ව්‍යාධි තත්්වයන්ගේ අහිතකර ප්‍රතිඵලය වනුයේ පිළිකා, ස්නායු ආශ්‍රිත රෝගාබාධ මෙන්ම සිය දිවි හානි කර ගැනීම්ය. එබැවින් භූ ව්‍යාධි තත්ත්වයන්ට ගොදුරු නොවූ ඉඩමක් තෝරා ගැනීම සුදුසුය. දක්ෂ වාස්තු ශිල්පියකුට අවට පරිසරයේ ස්වභාවය නිරීක්ෂණය කිරීමෙන් සහ බටහිර විද්‍යාත්මක උපකරණ මඟින් මෙවැනි තත්ත්වයන් හඳුනාගත හැකිය.
මීට අමතරව ප්‍රායෝගික තත්ත්වයන් ගණනාවක් ගැන සැලකිල්ලක් දැක්විය යුතුය. ඉඩමේ නීත්‍යනුකූල බව, ඉඩමට ගමන් කරන මාර්ගයේ කානු පද්ධතිය වගේම වැසි ජලය බැසීමට ඇති හැකියාවන් සහ රජයේ ආයතන මඟින් වැසි ජලය, අපද්‍රව්‍ය බැහැර කිරීම සම්බන්ධයෙන් පනවා ඇති නියෝගයන් සහ නිවාස ඉදිකිරීමේදී පනවා ඇති නීතිරීති ගැනද සැලකිල්ලක් දැක්විය යුතුය. ගංගා පිටාර ගලන, නිතරම ගංවතුර තර්ජනයන්ට ලක්වන ස්ථාන, මුහුදු කෑමට ලක්වන ස්ථාන සුදුසු නැත. නිතරම තෙතමනයෙන් යුක්ත මෙවැනි ස්ථානවල වාසය කරන්නන් රෝග පීඩාවලට ලක්වීමත් සමඟ එම නිවාසවල ආරක්ෂාවට ඉන් තර්ජනයක් වේ. මේ ආදී වූ ප්‍රායෝගික කරුණු ගැන මෙන්ම වාස්තු සිද්ධාන්තයන්ටද යටත්ව ඉඩමක් තෝරා ගැනීම මඟින් සාමය, සතුට පිරි නිවෙසක් ඉදිකර ගැනීමට හැකියාව ලැබේ.
සැලසුම් ශිල්පි, වාස්තු විද්‍යා සහ මනෝවිද්‍යා උපදේශක බී.ඒ. ජයවර්ධන
මාතලේ – නාඋල.
0382256020 / 0772753100
උපුටා ගැනීම මව්බිම
