ඔබේ නිවෙසේ ලස්සනට හැංඟුණු මාරයෝ…
සෑම ගෘහයකම වාසය කරන්නන්ගේ ප්‍රධානම අරමුණු අතර ඉහළින්ම සඳහන් වන කාරණයක් ලෙස නිවෙසේ අලංකාරය සඳහා දක්වන උනන්දුව හඳුන්වා දිය හැකියි. එනිසා බොහෝ දෙනකුගේ ආශාව වන්නේ අසල්වැසියාගේ නිවෙසට වඩා තමාගේ නිවෙස ලස්සන කරගන්නටය. එකකට එකක් නොපරදින ආකාරයට නිවාස අලංකාරය දිනපතා වර්ධනය කිරීමට බොහෝ දෙනකු උත්සාහ කරනු දක්නට ලැබේ. මේ හේතුව නිසාම ගෘහ අලංකරණ උපකරණ සහ ඊට අදාළ විවිධ නිෂ්පාදන වෙළෙඳපොළ තුළ ශීඝ්‍රයෙන් ව්‍යාප්ත වෙමින් පවතී.බොහොමයක් නිවාස දවසින් දවස වෙනස් වෙයි. ඇතැම් නිවාසවලට විවිධ කොටස් එකතු වෙයි. කිසිදු වගවිභාගයකින් තොරව මෙලෙස ඇතැම් අය නිවාස අලංකරණය උදෙසා කොටස් එකතු කිරීමට කටයුතු කරනු දක්නට ලැබෙන අතර, එයින් සිදුවිය හැකි සුබ සහ අසුබ ප්‍රතිඵල කවරේද යන්නත් නොදැන සිටීම තමා තමාටම කරගන්නා වරදකි.මේ දේවල් අතරින් නිවෙසක අලංකාරය උදෙසා බොහෝ දෙනකු කරනු ලබන විසිතුරු මාළු ටැංකි ඉදිකිරීමේදී විශේෂ සැලකිල්ලක් දැක්විය යුතුව තිබේ. මන්ද විසිතුරු මත්ස්‍ය ටැංකියකින් ලැබෙන අලංකාරය වගේම ඉන් මිනිසාගේ මනස නිරවුල් කරගැනීම උදෙසා හිමිවන්නේ සුළුපටු සහායක් නොවේ.ඉතා පිරිසිදුව පිළිවෙළකට පවත්වාගෙන යන මත්ස්‍ය ටැංකියකින් කාගේ වුවද සිත තුළ ඇති දහසකුත් ප්‍රශ්න අමතක කරවිය හැකි අතර, මත්ස්‍ය රංචුවක් යනු මනස භාවනාවකට සමවදින දර්ශනයකි.එහෙත් ඒ සුන්දර දසුන ඊට නුසුදුසු තැනක ස්ථානගත කිරීමෙන් ඒ ලස්සනට සැඟවී නිර්මාණය වන්නේ මහා අඳුරු වූ නපුරකි. අවැඩකි. එවැන්නක අවසන් ප්‍රතිඵලය අතිශය කටුක එකක් වෙනවාටද කිසිදු සැකයක් නැත.විශේෂයෙන්ම මත්ස්‍යයන් යනු ජීවීන්ය. ඔවුන්ට ජීවත් වීමට ඉතා සුදුසු පරිසරයක් තෝරාගත යුතු සේම, එම ඉදිකිරීම වාස්තු කරුණු කාරණා හා බද්ධ වන්නේ කෙසේද යන්න පිළිබඳවත් අවධානය යොමුකළ යුතුය. ඇතැම් විට නිවෙසේ විවිධ ස්ථානවලට ජලය අහිතකර වෙයි. ඇතැම් ස්ථානවල ජලය තැබීමෙන් අතිශය අහිතකර වාස්තු දෝෂ හටගනී. එමෙන්ම ඇතැම් නිවාසවල පොකුණු හා මස්ත්‍ය ටැංකි ස්ථානගත කිරීමට පොළොව හාරා ටැංකි සකසා තිබෙනු දැකගත හැකිය. මෙයද තැන නොතැන බලා කළ යුතුය. එසේ නොවන්නට ඇතිවන වාස්තු දෝෂ හරහා නිවැසියන්ගේ සෞඛ්‍ය, ආර්ථික මෙන්ම මානසික සමබරතාවද සැඟවී යා හැකිය.විවිධ කාල වකවානු අනුව මස්ත්‍ය ටැංකි නිර්මාණද විවිධාකාරයෙන් සමාජගත වෙයි. අතීතයේ ධනවත් බොහෝ දෙනකු පාරට ඇද දමන්නට තරම් ප්‍රබල වූ එවැනි නිර්මාණ සුවිසල් මන්දිරවල අදද දක්නට ලැබේ. මෑතකදී මා පරීක්ෂා කළ එක්තරා විශාල නිවෙසක සිටියේ ඉතා ප්‍රසිද්ධ ව්‍යාපාරිකයෙකි. එහෙත් ඔහු අද වෙද්දී දැඩි ආර්ථික ප්‍රපාතයකට වැටී සිටින බව ඔහුගේ මුවින්ම දැනගන්නට හැකි විය. එම නිවෙසේද ප්‍රධාන දොරෙන් ඇතුළු වෙද්දීම දක්නට තිබුණේ ඉතා අලංකාර පොකුණකි. ඒ වටා මනරම් බැම්මක් සහ පාලමක් වැනි ඉදිකිරීමකුත් සිමෙන්තිවලින් සැකසූ විශාල ගසකුත් විය. එහෙත් එම ඉදිකිරීම වාස්තු සිද්ධාන්ත හා ගැළපීමක් නොවූ අතර, විපත් කරදර ධන හානි බහුල කරවන නිර්මාණයක් බව මා හට අවබෝධ විය. පසුව මගේ උපදෙස් අනුව එය වෙනස් කිරීමට නිවැසියන් කටයුතු කළ අතර, අනතුරුව නව ව්‍යාපාරයක් ඇරැඹීමටද මා උපදෙස් දෙන ලදී. පසුගිය දිනෙක ඔවුන් මා අමතා පවසන ලද්දේ මේ වන විට යම් ආර්ථික ස්ථාවර බවක් ගොඩනැගෙමින් පවතින බවකි.මෙවැනි නිර්මාණ ඔබේ නිවෙසේත් වේ නම් යම් අසුබතාවක් ඔබට දැනෙනවා නම් වහාම ඒ ගැන දන්නා අයකුගෙන් විමසා සුදුසු දේ වටහාගැනීමට උනන්දු වන්න.ප්‍රවීණ ජ්‍යොතිෂවේදී ජය ශ්‍රී නන්ද කුමාරඋපුටා ගැනීම මව් රට නිව්ස්
