නිවෙසට සිරිදුව කැන්දන නිදන් වස්තු මංජුසාව සාදා ගන්නේ මෙහෙමයි
පුද්ගලයකු නිවෙසක් තනන්නේ කෙටි කාලීන පාරිභෝජනය පතා නොවේ. මූලික වශයෙන් පරම්පරා දෙක තුනක්වත් යනකම් කරදරයක් නැතිව ජීවත්වීම සඳහායි. නිවෙස තනා ගන්නවා වගේම එයින් ඇතිවන දෝෂවලින් බේරී යහපත් ජීවිත ගත කිරීමටත්, මූ දේවිය නිවෙසින් පන්නා ශ්‍රී දේවිය නිවෙසට කැන්දා ගැනීමටත් නිවැසියන් නොකරනා දෙයක් නොමැති තරම්ය. ඒ වගේම ඒ කාරණාව සත්‍ය වනවා සේම, නිවෙස තැනීමෙන් පසු දෝෂ හඳුනා ගන්නවාට වඩා සැලසුම් අවධියේදීම, එම දෝෂයන්ගෙන් මිදී ලස්සන නිවෙසක් තනා ගැනීම යහපත් බව ඉතා ඕනෑකමින් සිහිපත් කළ යුතුය. එසේම තට්ටු ගණන් උසට කොතරම් උසට නිවෙසක් ගොඩනැඟුවත් ජීවත් වන ජන්මීන්ට එහි යහපත් බලපෑම් අවම නම් ප්‍රතිඵලයක් පවතීදැයි ඔබටම පසක් වනවා ඇත.
කෙසේ නමුත් ඕනෑම අයකු පළමුව නිවෙසක් ගොඩනැඟීමේදී මෙන්ම තමාගේ ව්‍යාපාරයක් උදෙසා ගොඩනැඟිල්ලක් ඉදිකිරීමේදීත් අතීතයේදී මෙන්ම වර්තමානයේදීත් බොහෝ දෙනා නිවෙසින්, ගොඩනැඟිල්ලෙන් යස ඉසුරු ලැබ ගැනීමට නිදන් වස්තු මංජුසාවක් තැන්පත් කිරීම සිදු කරනු ලබයි. නිවෙස ආරම්භයේදී නිවෙස් හිමියාගේ ජන්ම නැකැතට සීහෙන ප්‍රබල නැකැතකට මෙම චාරිත්‍රය සිදුකිරීම කරනු ලබන අතර, නිවෙසට හෝ ගොඩනැඟිල්ලට ප්‍රබල වටිනාකමක් ලබාදීම උදෙසා විශේෂයෙන් මෙය සිදු කරනු ලබයි. අතීතයේ රජ දවස නම් මුතු - මැණික් - ගජ මුතු - රන් - රිදී ගහන වූ හෙයින්, මෙන්ම එකල ඒවා යස ඉසුරේ සංකේතයක් බවද පිළිගෙන තිබූ බැවින් වැඩි වටිනාකමක් ලබාදෙමින් පිරිවැය ප්‍රශ්නයකින් තොරව යොදා ගැනීමට හැකියාව ලැබ තිබිණි. නමුත් වර්තමානයේ එසේ සිදුකිරීම සත්‍ය වශයෙන් අසීරු කාරණාවක් වන නමුත් වාස්තු විද්‍යානුකූලව නිවැරැදිව නිදන් වස්තු මංජුසාවක් සාදා ගැනීමේ බලවත් හැකියාවක් පවතී. මේ සඳහා යොදාගනු ලබන බහාලුමේ පහත දක්වන ලද සියලු දේ නිසි ප්‍රමාණයන්ගෙන් තැන්පත් කිරීම සඳහා යොදා ගන්න. එසේම අප මෙහිදී යොදා ගනු ලබන බහාලුම පිළිබඳවත් අවධානයට ලක් කළ යුතුය. සමහරුන් මෙම බහාලුම සඳහා මැටි බඳුන් යොදා ගැනීම සිදු කරනු ලබයි. නමුත් නිවෙසේ පැවැත්ම සේම නිදන් වස්තු මංජුසාවේ පැවැත්ම සහතික කිරීම උදෙසා තඹ - පිත්තල වැනි කල් පවත්නා ලෝහමය බඳුනක් යොදා ගත්තාටද වරදක් නොවන්නේය.
මංජුසාවේ තැන්පත් කිරීමට අවශ්‍ය ද්‍රව්‍ය:
කස්තුරි, නවරත්න, ගෝරොචනා, පස්ලෝ, රත් හඳුන්, උඳු, මුං, තල, මෑ, වී, අගිල්, ගුගුල්, තුවරලා, සැවැන්දරා මුල්, ඊතණ, එළඅබ, රත්මල් කැකුළු, සමන්පිච්ච කැකුළු, මානෙල්, නෙලුම්, ඕලු, නාමල්, රුක්අත්තන මල් රේණු, කපු ඇට, කුඹුරු ඇට, වැල්මී, වෙනිවැල්ගැට, කොහොඹ අරටු, මී ඇට, මුහුදු වැලි, ගඟේ වැලි, ඇළේ වැලි, ෙදාළේ වැලි, පරිවත පස්, ඇතා බිඳි පස්, සමුද්‍ර පර්වත මැටි, මුහුදු ජලය, ගඟේ ජලය, වෙලේ ජලය, ඇළේ ජලය, ෙදාළේ ජලය, ඔයේ ජලය, පොකුණු ජලය, වැහි ජලය, කොහොඹ තෙල්, මී තෙල්, ගිතෙල්, තැඹිලි තෙල්, අබ තෙල්, කැකුළු හාල්, කපුරු, එනසාල්, අංජන කැට, රන්, රිදී, මුතු, මැණික් යනාදිය නිවැරැදිව සොයා ගැනීම කළ යුතුය.
මෙසේ නිවැරැදිව සොයා සකසා ගන්නා ලද ද්‍රව්‍යයන් නිදන් වස්තු මංජුසා බහාලුමේ නිවැරැදිව අසුරා තැන්පත් කොට, ස්වාමීන් වහන්සේලා දෙතුන්නමක් ලවා සෙත් පිරිත් සජ්ජායනය සහ ආශීර්වාදය මධ්‍යයේ නිදන් වස්තු මංජුසාව තැන්පත් කළ යුතු වන්නේය. වර්තමානයේ සරල බව සහ පහසුව සලකා බොහෝ දෙනා නිදන් වස්තු මංජුසාව අලෙවිසල්වලින් මිලදී ගැනීම සිදු කරනු ලබයි. එහෙත් මේවායේ අන්තර්ගතය කෙබඳුදැයි තීන්දු තීරණ ගැනීමට නිවෙස් හිමි ඔබම අවධානය යොමු කළ යුතුව ඇත. තෙරුවන් සරණයි!
උපුටා ගැනීම මව්බිම
