නිවෙසක සුබ අසුබ ගැන කියන සතර කොන
නිවෙසක ප්‍රධාන මුළු හතර වන ඊසාන, ගිනිකොන, නිරිත, වයඹ යන මුළු හතරෙන් නිවෙසට අසුබ ප්‍රතිඵල ගෙන එන අවස්ථා ඇත. නිවෙසේ සම්පූර්ණ ශක්තිය රැඳී පවතින මෙම මුළු හතරින් එකක් හෝ බිත්ති දෙකේ සබඳතාව පුපුරා කැඩී වෙන්වී තිබේ නම් නිවෙසේ ශක්තිය හීන වීම විද්‍යාත්මක ස්වභාවයයි. ඒ සමඟම යම් ගුප්තමය අසුබතාවක්ද ඇති බව කිව යුතුය.
- නිවෙසේ ඊසාන දිග මුල්ල බිත්තිය පුපුරා පොළොව දක්වා පැතිරීම දරුවකුට තදබල මාරක තත්ත්වයක් උදාවෙන බවට පෙර නිමිත්තකි.
- ගිනිකොන දිග පුපුරා පහළටම දුවයි නම් අඹු සැමි අරගල අවුලක් ඇතිවීම පෙන්නුම් කිරීමකි.
- නිරිත දිග මුල්ල පුපුරා පහළට බසී නම් පවුලේ අයකුට දරුණු රෝග තත්ත්වයකි.
- වයඹ දිග මුල්ල පුපුරා යයි නම් භාර්යාවට හෝ ගැහැනු දරුවකුට තදබල මාරකයකි.
මේ ආකාරයෙන් ගුප්තමය දෝෂ තත්ත්වයක් ඇතිවන බව අත්දැකීම්වලින් පවසමි. ඊළඟට වාස්තුමය අංශයෙන්ද නිවෙසක මුළු හතරෙන් දෝෂ ඇතිවන ආකාරය සොයා බලමු.
- නැඟෙනහිර දිශාවට යොමු වී ඇති මෙවැනි නිවෙසක ‘ශිඛී” නමින් හැඳින්වෙන ඊසාන මුල්ලේ එල් හැඩය පොරොව ආකාරයෙන් දොර හා ජනේලය එකට එකතු කර තැබීම ඉතාම අසුබ වාස්තු දෝෂයකි. සැඬ සුළඟකින් නිවෙසට හානි සිදුවන බව වාස්තුවේ සඳහන් වන අතර අධ්‍යාපනය ලබන දරුවකුට තදබල අසුබ ගෙන දෙන ආකාරයම දැක ඇත්තෙමි.
- ඊළඟට “අනිල” නමින් හැඳින්වෙන ගිනිකොන දිග මුල්ලද ප්‍රධාන දොර තැබීමට ඉතාම අසුබ වන අතර මෙය දරුපලවලට මාරක උදාකරන වාස්තු දෝෂයකි. ඒ අතරම නිවෙසේ ප්‍රධානියාට මාරක රෝග ගෙන එන වාස්තු දෝෂයක් බව ම දැක ඇත්තෙමි. දරුවන්ගේ විවාහ කටයුතුද ප්‍රමාද වීමට හේතු වේ.
- ඊළඟට බටහිර පැත්තේ නිරිත මුල්ල “පීතෘ” නමින් හැඳින්වේ. මෙම නිරිත කොන මුල්ලෙහි ප්‍රධාන දොර තැබීමෙන් පුත්‍රයන්ට හානි පීඩා, සතුරු පීඩාගෙන දෙන බව වාස්තුවේ සඳහන්වේ. විශාල ධන හානි, රෝග පීඩා ගෙන දෙනවා ඇත.
- උතුරු පැත්තේ වයඹ මුල්ලද ප්‍රධාන දොර තැබීම සඳහා ඉතා අසුබ වන්නේය. “රෝග“ නමින් හැඳින්වෙන මෙම කොටස වායු කොන යනුවෙන්ද වාස්තුවේ සඳහන් වේ. වධ බන්ධනවලට අසුවී විනාශයට පත් කරවන මෙම වයඹ මුල්ලේ දොර තැබීමෙන් වළකින්න. දොර තැබුවොත් රෝග පිට රෝග වැලඳී විනාශයට පත්වේ.
- ඊසාන මුල්ලෙහි කිලිටි රෙදි රාක්ක, කැපෙන ආයුධ, පොරෝ, උදලු තැබීම අසුබයි. දරුවන් අතර අසමඟිය ආරවුල් ඇතිවේ. ඉහත දේවල් නිරිතට ගන්න.
- ගිනිකොන මුල්ලෙහි ගෑස් ළිප, දර ළිප, මිරිස් ගල තැබීම අසුබයි. නිවෙසේ සියලු දෙනා අතර අසමඟිය ඇතිවේ. ඉහත කී දේ මුල්ල පන්නා පැත්තකට ගන්න.
- කන කර ආභරණ, රත්රන්, මුදල් නිරිත මුල්ලට අසුබ වේ. සියල්ල විනාශ වේ. වටිනා වස්තුව උතුරට ගන්න.
- වී හාල්, කෝපි, පුවක් ආදී තැබීමට වයඹ මුල්ල සුබදායක වේ. ගෙවතු වගාවේ අල,බතල ආදී තැබීමට සුබයි.
- ආගමික කටයුතු සඳහා සුදුසු නැත. ඒ සඳහා උතුර ඊසාන මුල්ල හොඳයි.
මේ ආකාරයෙන් නිවෙසක ප්‍රධාන මුළු හතර තුළ ඉමහත් බලපෑමක් නිවසේ අයට ඇතිවන බව විශේෂයෙන් කිව යුතුය. නිවෙසක භූත දෝෂ ප්‍රේත කොටස් බොහෝ දුරට මෙම මුළු ආශ්‍රිතව අරක් ගන්නා බවද සඳහන් කරමි. එම නිසා මෙම මුළු හතර ආශ්‍රිතව ප්‍රධාන දොර තැබීම නොකළ යුතුම අතර අනෙකුත් කටයුතු වාස්තුවේ සඳහන් පරිදි පෙන්වා දී ඇති ආකාරයට කිරීමට වග බලා ගන්න.
උපුටා ගැනීම මව්බිම
