ලස්සන නිවෙසට සැලැසුම වැදගත්
ඔබ දැන් දන්නවා නිවෙසක් සැලසුම් කිරීමේදී වාස්තු විද්‍යානුකූලව නිවැරැදි බව, නවීන පෙනුම හා අලංකාර බව, වියදම් අඩු කිරීම යනාදියේ වැදගත්කම. මේවා නිවාස සැලැසුමෙන් ඉස්මතු කර ගන්නේ කොහොමද කියල බලමු.
ගෙයක් ලස්සන කරගන්න ඇතැම් අය කෙතරම් මුදලක් නිරපරාදේ වැය කරනවාද? ඒ වුණාට එහෙම කරන්න අපි හැමෝටම හැකියාවක් නැහැ. සල්ලි තිබුණත් අනවශ්‍ය ආකාරයට එහෙම කරන්නත් එපා. ඇත්තටම නිවෙසකට අලංකාරය ලබා ගත යුත්තේ සරල දේවල් තුළින්. උදාහරණ විදියට නිවෙසේ ජ්‍යාමිතික හැඩතල, සරල හැඩතල සහිත වහලය, චාම් දොර ජනේල මෝස්තර ආදිය දක්වන්නට පුළුවන්. මේ සරල බව අලංකාරයටම විතරක් නෙමෙයි දිගු කල් පැවැත්මට, පහසු නඩත්තුවට, වියදම් අඩු ඉක්මන් ඉදිකිරීමටත් බෙහෙවින් ඉවහල් වෙනවා. තවදුරටත් මා එය මෙසේ විස්තර කරන්නම්. නිවෙසේ ඇති අංග සරල හැඩතලවලින් යුතු ඒවා නම් ඉදිකිරීමේදී වඩාත් පහසුයි. ඒ විතරක් නෙවෙයි. ඉඩකඩ අපතේ යන ආකාරයේ අනවශ්‍ය මුලු මඟහරින්නත් පුළුවන්. අලංකාර සරල වහලයක් නිර්මාණය කිරීමටත් මෙය දායක වෙනවා. සමහර අය ගෘහ අලංකාරය උපරිම කර ගන්නට යැයි සිතා ළඟ ළඟ හැඩතල ඇති බිත්ති දමනවා. මේවාට ගැසිය යුතු වහලත් බොහෝ විට සංකීර්ණයි. සංකීර්ණ වහලයක් කියන්නේ බාල්ක, මුදුන් ලී, යටලී, කුරුපා, කානු පරාල ආදිය වැඩියෙන් යොදන්න වෙන වහලයකටයි. මෙහෙම වුණාම වහලය හදන්න යන මිනිස් ශ්‍රමයත් වැඩියි. ඒ විතරක් නෙවෙයි. කෑලි කැපීම නිසා අපතේ යන ලී හා ෂීට් ප්‍රමාණයත් වැඩියි.
බොහෝ වාස්තු දෝෂයන්ටත් මෙය හේතු වෙන්න පුළුවන්. මෙම බාල්ක, යටලී, මුදුන් ලී, කුරුපා ආදිය දොර ජනෙල් උඩට එන එක හොඳ නැහැ. සංකීර්ණ වහලයක් රඳවා ගැනීමට වැඩිපුර බාල්ක දමන්නත් වෙනවා වාගේම මේවා නිදන කාමර හරහා යනවා නම් කාමරයේ තියෙන ඉඩ බෙදීමකට ලක් වෙනවා. මේ බාල්ක යටින් නිදන ඇඳන්, පාඩම් කරන මේස ආදිය තියන්න හොඳ නැහැ. බාල්ක කියන්නේ වැඩි බරක් දරන ඒවා. ඉතින් මේවා යට වැඩි වෙලාවක් සිටින එක සමතුලිත මානසික ඒකාග්‍රතාව වෙනස් වීමට හේතුවක්. මේ නිසා තමයි මා කිව්වේ කාමරයේ තියෙන ප්‍රයෝජනවත් ඉඩ මේවායින් බෙදෙනවා කියා. දැන් ඔබ හැඩතල වැඩියෙන් දමා පිළියෙල කරගත් සංකීර්ණ වහලයක් ගැන හිතන්න. නිසියාකාරව මෙය පිළියෙල කළේ නැතිනම් වැස්සකදී වතුර කාන්දු විය හැකි තැන් ගණන ඉහළයි. එතකොට වහලයේ කල් පැවැත්මට බාධාවක් වෙනවා. මෙහෙම වෙලා අපි හිතමු වහලයේ ලීයක් දිරා ගිහින් කියලා. එතකොට ඒක මාරු කරන්න වහලයේ වැඩි කොටසක් ගලවන්න වෙනවා. නමුත් සරල වහලයක සරලවම මේවා කරගන්න පුළුවන්.
විදුලිය, ජලය, දුරකතන, රූපවාහිනි, ආරක්ෂක කැමරා, වාසුසමීකරණ ආදිය ගැනත් නිවාස සැලසුමේදී හිතන්න ඕන. මෙම සේවාවන් සඳහා වෙන්කළ ගමන් මාර්ග තිබීම නිවෙසේ අලංකාරයටත් පහසු නඩත්තුවටත් ඉවහල් වෙනවා. බිත්ති දිගේ යන වතුර බට, දුරකතන හා ඇන්ටනා රැහැන් ආදිය නිවෙසේ අලංකාරයට බාධාවක්. ඒ නිසා හැකිතරම් මේවා නොපෙනෙන්නටත්, සේවා අවශ්‍යතා සඳහා පහසුවෙන් ළඟා වෙන්නට හැකි විදියටත් සඟවන්න ඕනෙ. ගෙදර හදාගෙන යන අතරතුරේ තමයි ඇතැම් අයට නිවෙසේ විදුලි පද්ධතිය ගැන හිතෙන්නේ. ප්‍රධාන විදුලි බෙදුම් පුවරුව සවි කරන්නේ කොතැනදැයි කල්පනා කරන්නේ පසුවයි. මේ සඳහා සුදුසු බිත්තියක් සහිත තැනක් සැලැසුමේ නොමැති බව ඔවුනට සිහිවන්නේ එවිටයි. මෙය සවි කිරීමේදී නිවෙසේ පරිපථ රැහැන් සංකීර්ණ නොවී වියදම අඩුවෙන ආකාරයට සැලැසුම් කිරීම හා එවන් තැනක සවි කිරීම කළ යුතුයි.
ඔබ භාවිත කරන්න යන විදුලි උපකරණ ගැනත්, ඒවායේ ධාරිතාවන් හා තැබිය යුතු තැන් පිළිබඳවත් දැනීම මෙහිදී අත්‍යවශ්‍යම වෙනවා. පසුවට නැවැත පරිපථ වෙනස් කිරීම අපහසු දෙයක් විය හැකියි. භූගත විදුලි රැහැන්, ජල නළ, අපද්‍රව්‍ය බැහැර කිරීමේ නළ ආදිය ගැන මේ ආකාරයටම මුලදී සිතීම වැදගත්. එහෙම නැත්නම් සමහර විට ඔබට පොළොවට අල්ලා තිබෙන ටයිල් පවා ඉවත් කර මේවාට ඉඩකඩ සපයන්න වෙනවා. එම නිසා මේවා ගැන විශේෂ තාක්ෂණික දැනුමක් සැලැසුම් ශිල්පියා සතු වීම වැදගත්. නිවෙස හදන ගමන් මේවා ගැන හිතන්න ගියොත් වෙන්නේ මහා අපරාධයක්. බැඳපු බිත්ති ගලවන්න වෙනවා. කොන්ක්‍රීට් සිදුරු කරන්න, කපන්න වෙනවා. ටයිල් කරපු තැන් කඩන්න වෙනවා. වහලයේ කොටස් නැවැත විවෘත කරන්න වෙනවා. මේ වගේ ඔබට වෙන්නේ ඩබල් වියදම් කරන්නයි. හරියාකාර සැලැසුමක් තිබුණා නම් මෙහෙම වෙන්නේ නැහැ. තවත් එක් වැදගත් දෙයක් තමයි නිවෙසට අහිතකර වේයන්, කෘමීන් ආදීන්ගෙන් නිවෙස ආරක්ෂා කර ගැනීමට පිළියම් යෙදීම. මුල් අත්තිවාරම්, පොළොව කොන්ක්‍රීට් කරන අවස්ථාවේදී මෙය සිදු කිරීම වඩාත් ප්‍රතිඵලදායකයි. මේවාට යොදාගන්නේ උග්‍ර විස සහිත රසායනික ද්‍රව්‍යයන්. එම නිසා බලය ලත් ආයතනයක සහාය ලබා ගැනීමට ඔබට සිදු වෙනවා. මුලදී මේ දේවල් ඔබ කළේ නැතිනම් වටිනා ගෘහභාණ්ඩ, දොර ජනේල පමණක් නොව ඇතැම් විට වහලය දක්වාත් කෘමීන් පැතිරී යා හැකියි.
නිවෙස් සෑදීම වෙනුවෙන් ඔබ මුදල් වැය කරන්නේ රුපියල් ලක්ෂ කෝටි ගණනින්. මා කියූ දේවල්වල වැදගත්කම දැන් ඔබට මනාව වැටහෙනවා නේද?
"නිවෙසක් ඉදිකිරීමේදී නිවැරැදි වාස්තු විධි, අලංකාරය, සරල බව, ඉක්මන් ඉදිකිරීම, වියදම් අඩුවීම, නවීන තාක්ෂණය, පහසු නඩත්තුව, කල් පැවැත්ම කියන්නේ එකිනෙක බැඳුණු ජාලයක්. වැඩි දෙනෙක් ගෙයක් ගැන සිහින මවන්නේ මේවා එකක් දෙකක් පමණක් හිතේ තියාගෙන. එහෙම වෙන්නේ නැතිව කලින් කියූ හැම දෙයක් ගැනම අවධානය යොමු කිරීම මූලික සැලසුම් කිරීමේදී අත්‍යවශ්‍යයි. එතකොට තමයි කිසිවක් මඟහැරී යන්නේ නැතිව ඔබට සාර්ථක සමබර නිර්මාණයක් බිහි කර ගන්නට හැකි වන්නේ."
උපුටා ගැනීම මව්බිම
