ධනය වැඩි කරවන වාස්තු රහස්
සමාජයේ ජීවත් වන සමහර පුද්ගලයන් හට යහමින් ධනය ලැබෙන අතර ඔවුන් ධනවතුන් ලෙස වැජඹෙන අතර සමහර පුද්ගලයන් හට ධනය නොලැබී යන අතර ඔවුන් දිළින්දන් ලෙස කල් ගෙවනු ලැබේ. සමාජයේ පවතින මේ ධනය බෙදීයෑමේ විසමතාව මත දුප්පත් පිරිසක් හා පොහොසත් පිරිසක් ලෙස කොටස් දෙකකට බෙදී ඇති අතර එම දුප්පත්කම අතරද මට්ටම් පවතින අතර පොහොසත්කම අතරද තව තවත් උප මට්ටම් ඇත. සමහර පුද්ගලයන් දුප්පත්ව සිට කෙටි කාලයකින් ධනවතුන් අතරට පැමිණෙන අතර සමහර පුද්ගලයන් ධනවතුන්ව සිට කෙටි කාලයකදී දිළිඳු බවට පත්වන බවට ඕනෑතරම් ප්‍රායෝගික උදාහරණ සමාජය තුළින්ම ඔබ දැක ඇතිවාට සැක නැත. මේ සෑම අවස්ථාවකදීම බොහෝ දෙනා පවසන්නේ එය ඔහුගේ කර්මය බවයි.
ධනවතකු දුප්පත් වූ විට පව් පලදීම ලෙසද දුප්පතකු පොහොසත් වූ විට පින් පලදීම ලෙසද සමාජය විසින් හඳුන්වනවා. ඇත්තටම සිදුවන්නේ කුමක්ද යන්න පිළිබඳ බුද්ධ දේශනාවේදී මනාව පැහැදිලි කොට ඇති අතර ඒ ඒ පුද්ගලයාගේ කුසල් අකුසල් ශක්තියේ වෙනස් වීම ඒ තුළින් පිළිබිඹු වන බව පෙන්වාදී තිබෙනවා. එසේ වුවද කිසියම් පුද්ගලයකුගේ කුසල් අකුසල්වල ශක්තිය හෝ තරම පිළිබඳ හෝ එය වෙනස් වන කාලවකවානු පිළිබඳ ප්‍රකාශ කිරීමට සාමාන්‍ය පුද්ගලයන් වන අප හට නොහැකි අතර එය කර්ම විෂයට අයත් බැවින් එම තත්ත්වය නිවැරැදිව විග්‍රහ කළ හැක්කේ සම්මා සම්බුදුවරුනට පමණි. මේ නිසා සාමාන්‍ය පුද්ගලයන් වන අපට මේ සෑම අවස්ථාවකදීම කර්මය නිසා මෙය සිදු වූවාය යන්න පවසා සෑහීමකට පත්වන්න සිදුවෙනවා. පුද්ගලයාගේ කර්ම ශක්තිය විග්‍රහ කිරීමට අපට නොහැකි නිසා කර්ම ශක්තිය හොඳ අතට හරවා ගැනීමේ උපක්‍රමයන් භාවිත කිරීමට අවශ්‍ය චතුර් විද්‍යා විෂය ඥානය ලැබී තිබෙන අතර ඒවා ප්‍රයෝජනයට ගැනීමේ හැකියාවක් පවතිනවා. ඒ අතර පුද්ගලයකු දුප්පත්වීමට බලපාන වාස්තු ශිල්පීය කරුණු මොනවාද යන්න ඔබ වෙත පැහැදිලි කරදීම මේ ලිපියේ අරමුණ වෙයි.
උතුරු - දකුණු දිශා ද්වාර භාවිතය :
ගෘහයක ධනය විනාශ වී එම ගෘහවාසීන් දුප්පතුන් බවට පත්වීමට එම ගෘහයේ ද්වාර සටහන ප්‍රබල සාධකයක් ලෙස පෙන්වා දී තිබෙනවා. ඒ අතර යම් ගෘහයක ඇත්තේ උතුර - දකුණු ද්වාර සටහනක් නම් එම ගෘහ වාසීන්ගේ ධනය පිරිහී ගොස් දුප්පත්වන බව මහා වාස්තු සෘෂී මතයයි. ඔබගේ ගෘහයේ මංගල ද්වාරය උතුරේ තිබෙන විට මුළුතැන්ගේ ද්වාරය දකුණු දිශාවේ පිහිටීම හෝ මංගල ද්වාරය දකුණේ ඇති විට මුළුතැන්ගේ ද්වාරය උතුරේ පිහිටීම මේ ද්වාර සටහනට ඇතුළත් වන අතර එවැනි නිවාසවල බලවත් වන අයහපත් ප්‍රතිපල පහත පරිදි විය හැකිය.
- කවදා හෝ දිනයක නිවෙස සොර සතුරන්ට ගොදුරු වෙයි.
- කවදා හෝ දිනයක තම දරුවන් තමන්ට විරුද්ධ වන අතර ධනය විනාශ වෙයි.
- කවදා හෝ දිනයක රාජ බිය ඇතිවී ධනය විනාශ වෙයි.
මේ ආකාරයට උතුරු - දකුණු ද්වාර සටහන් යෙදී ඇති නිවාස හිමිවී ඇති ගෘහයක වර්තමානයේ ධනය ගැවසුණද අනාගතයේදී ධනය පිරිහී දුප්පත් වීමට ඇති ඉඩකඩ බහුල බැවින් ඔබ ඒ ගැන දැන් සිටම දැනුවත් වී සිටියහොත් කර්මය පිළිබඳ පූර්වකථනය කිරීමේ ශිල්පීය ඥානය ඔබට ලැබෙන බව කිව යුතුයි. දැන් ඔබ ජීවත් වන නිවෙසේ ඇත්තේ උතුරු - දකුණු ද්වාර සටහනක් වුවද ඔබට යහමින් මුදල් ලැබෙන අතර ඔබ ධනවත්ව සිටිනවා විය හැකිය. එයට හේතුව නිවෙසේ දෝෂවලට වඩා ඔබගේ කුසල් ශක්තිය මේ අවස්ථාවලදී බලවත්ව පවතින බැවිනි. එසේ වුවද ඔබගේ කුසල් ශක්තිය දුර්වල වී අකුසල් බලවත් වන අවස්ථාව උදා වන විට ඔබගේ ගෘහයේ වාස්තු දෝෂවල අයහපත් ප්‍රතිපල ඔබට නිතැතින් උදාවනු ඇත. මේ නිසා පොහොසතුන් හිටි හැටියේ දුප්පතුන් බවට පත් වන්නේ එබැවිනි.
ඔබගේ නිවෙසේ දැනටමත් ඇත්තේ උතුරු - දකුණු දිශාවලට යෙදී ඇති ද්වාර සටහනක් නම් ඔබ එම දෝෂ හඳුනාගෙන එය වාස්තු ශිල්පයට එකඟ කර ගැනීම කළ යුතු වෙනවා. එහිදී ඔබ කළ යුත්තේ ඔබගේ ගෘහයට පොදු ස්ථානයකින් (කාමර හැර) නැඟෙනහිර දිශාවෙන් හෝ බටහිර දිශාවෙන් ඔබගේ ගෘහයට නව ද්වාරයක් විවෘත කර ගැනීමයි. නැඟෙනහිර දිශාවෙන් ඔබ නව ද්වාරයක් එක් කළ විට "ධනද" නමැති ඉතා යහපත් ද්වාර සටහන ගෘහයේ බලවත් වන අතර බටහිර දිශාවෙන් ද්වාරයක් එක් කළ හෝ "විපුල" නම් යහපත් ද්වාර සටහන බලවත් වනු ඇත. ප්‍රායෝගිකව හැකියාව ඇතිනම් නැඟෙනහිර හා බටහිර යන දිශා දෙකෙන්ම ද්වාර දෙකක් ගෘහයට විවෘත කළ හැකිනම් ඔබගේ ගෘහයේ සතර දිශා ද්වාර සටහන නැත්නම් "විජය" නමැති ඉතා යහපත් ද්වාර සටහන බලගැන්වෙනු ඇත.
ධනවත් වන ද්වාර සටහන්
- උතුර + දකුණ + නැඟෙනහිර = "ධනද" (ධන සම්පත් බහුල වෙයි)
- උතුර + දකුණ + බටහිර = "විපුල" (කීර්ති ප්‍රසංශා ලැබේ)
- උතුර + දකුණ + නැඟෙනහිර + බටහිර = "විජය" (යස ඉසුරු සම්පත් පහළවෙයි)
දැන් ඔබට කියා දෙන්නම් ඉතා දුප්පත්ව සිටි කෙනෙක් ඉතා කෙටි කාලයකින් ධනවතකු වන්නේ කෙසේද කියා. කිසියම් පුද්ගලයකුගේ වර්තමාන ජීවිතයේ අකුසල් බලවත්ව පවතින විටදී ඔහු ධනයෙන් පිරිහී යනවා. එම පුද්ගලයා තමන්ගේ ගෘහ පරිශ්‍රයට ධනද, විපුල හෝ විජය ද්වාර සටහනක් එක්කර ගන්නවා. එවිට ඔහුගේ අකුසල් ශක්තිය දුර්වල වී කුසල් ශක්තිය බලවත් වෙනවා. ඔහුගේ ධනය ඉපයීමේ ශක්තිය ප්‍රබල වී කෙටි කාලයකින් ධනවතකු බවට පත් වෙනවා. මේ ආකාරයටම යම් පුද්ගලයකු වර්තමාන ජීවිතයේදී කුසල් බලවත් වී ධනවතකු වී සිටිනවා. ඔහුගේ ගෘහයේ ද්වාර සටහන උතුරු - දකුණු ද්වාර සටහනක් ලෙස පවතිනවා. ඔහුගේ අකුසල් බලවත් වී ඔහුගේ ධනය කෙටි කාලයකින් පිරිහී ගොස් ඔහු දුප්පතකු බවට පත් වෙනවා.
ඔබගේ ගෘහය යනු ඔබගේ ජීවන ගමන් මගේ කැඩපත බව ප්‍රකාශ කළ යුතුයි. නිවෙසේ පවතින වාස්තු තත්ත්වයන් නිසි පරිදි නිරීක්ෂණය කර එම ගෘහ වාසීන්ගේ අනාගත ජීවිතය කෙලෙස වේවිද කියා කලින්ම පූර්වෝකථනය කළ හැකි බව කිව යුතුයි. උතුරු - දකුණු ද්වාර සටහනට අමතර වශයෙන් ඔබගේ ධනය පිරිහී දුප්පත් වීමට බලපාන ප්‍රබල අයහපත් ද්වාර සටහන් කිහිපයක් පවතින බව මතක තබා ගන්න. එනම් යම් ගෘහයක පිහිටා ඇත්තේ ඇතුළුවීමට හා පිටවීමට එක් ද්වාරයක් පමණක් නම් එම ද්වාරය බටහිර දිශාවේ හෝ උතුරු දිශාවේ යෙදී තිබීම නිසා ඔහු අන්ත දිළින්දකු වන අතර, මෙය උතුරු - දකුණු ද්වාර සටහනට වඩා ප්‍රබලව සක්‍රිය වන අයහපත් ද්වාර පිහිටීමක් ලෙස මහා වාස්තු ශිල්පයේ පෙන්වා දී තිබෙනවා. බටහිර දිශාවෙන් පමණක් ප්‍රධාන ද්වාරයක් යෙදී ඇති විටක එම ද්වාර "බර" නැත්නම් දුප්පත් බවේ ද්වාරය ලෙස හඳුන්වන අතර උතුරු දිශාවෙන් පමණක් ප්‍රධාන ද්වාරය යෙදී තිබෙන විට එය "දුර්මුඛ" නැත්නම් කායික සහ මානසික පීඩනය බලවත් කරන ද්වාර සටහනක් ලෙස බලවත් වනු ලබයි.
ගෘහයක මංගල ද්වාරයේ පියන වමට විවෘත වීම සහ දෝෂ පාද පිහිටීම :
යම් ගෘහයක මංගල ද්වාරයේ පියන එළියේ සිට විවෘත කරන විට වාමාවෘත්තව විවෘත වන්නේ නම් එම ගෘහවාසීන් දිළිඳු බවට පත් වන අතර දක්ෂිණාවෘත්තව විවෘත වන්නේ නම් ගෘහයේ ධනය සුරැකේ. මීට අමතරව ගෘහයක මංගල ද්වාරයක "භද්‍ර" සහ "රික්තා" නමැති අයහපත් පාදවලින් යෙදී ඇති විටෙක ගෘහයේ සම්පත් හීන වන අතර "නන්දා" ,"ජයා", "පූර්ණා" නමැති සුබ පාදවල යෙදී ඇති විටෙක එම ගෘහයේ ධනය රැඳීම බහුල වන බව මහා වාස්තු පුරාණයේ පෙන්වා දී තිබෙනවා. මහා වාස්තු ශිල්පයට අනුව යම් ගෘහයක ජීවත් වන ගෘහ වාසීන් දුප්පත් වීම හෝ පොහොසත් වීම උදෙසා බලවත්ව සක්‍රිය වන වාස්තු අංගයක් ලෙස එම නිවෙසේ ද්වාර සටහන මූලිකව දායක වන බව කිය යුතුයි. ඔබගේ ධනය පිරිහී ගොස් ඔබ දිළින්දකු වීමට ප්‍රථම ගෘහයේ ද්වාර සටහන පිළිබඳ නිසි ලෙස අවධානය යොමු කිරීමෙන් අනාගත අවදානමෙන් ආරක්ෂා වීම උදෙසා ඔබට හැකියාව ලැබෙනු ඇත. මිනිසුන්ගේ අකුසල් බලවත් කාලවලදී කිසිම ආධ්‍යාත්මික කටයුත්තක් උදෙසා සිත නැඹුරු නොවන අතර සෑම විටම අකුසල්වල ප්‍රතිවිපාක පල දීමේ දිශාවටම ගමන් කිරීම සිදු වෙයි. ඔබ සෑම විටම ඔබගේ අකුසල් සිත පිළිබඳ ප්‍රඥාවෙන් විමසා බලා බුද්ධිමත්ව කටයුතු කිරීම තුළින් පමණක් ඔබට අකුසල් පරාජය කිරීමේ ආධ්‍යාත්මික ශක්තිය වර්ධනය වනු ඇත. මේ නිසා ඔබ සෑමවිටම මහා විෂ්ණු දෙවියන්ට පින් අනුමෝදන් කොට කුසල් සිත් වර්ධනය කර ගනිමින් දේව ශක්තිය ලබා ගන්න. ඒ තුළින් ඔබගේ ගෘහයේ දෝෂ දුරු වී ධන ධාන්‍යයෙන් හා නිරෝගී සම්පතින් බහුල වනු ඇත.
උපුටා ගැනීම මව්බිම
