නිවෙසට ධන වාසනාව ගලා එන්නේ කොතැනින්ද?
මිනිසුන්ට තමන්ගේ ජීවිතය පහසුවෙන් ගත කිරීමට ධනය අවශ්‍ය වන බව ඔබ දන්නවා. ධනයෙන් හීන වන කෙනාගේ ජීවිතය සුවපහසුවට ගතවන්නේ නැහැ. ලෞකික ජීවිත ගත කරන අප සැමට අපගේ කටයුතු පවත්වා ගැනීම උදෙසා ධන සම්පත අත්‍යවශ්‍ය සාධකයක් බව අමුතුවෙන් කිව යුතු නොවේ. ඒ නිසා ලෞකික ජීවිත ගතකරන ජනයාගේ ජීවිතය සුවපහසු කිරීමට අවැසි ධනය හිමි කරගන්නේ කෙසේද යන්න පිළිබඳ වාස්තු ශිල්පයේ මනාව පැහැදිලි කරදී තිබෙනවා. ඔබත් ඔබගේ නිවෙසට ධන සම්පත සහිත වාසනාව ළඟා කරගැනීමට කැමති නම් මානව ඉතිහාසයේ බිහි වූ මහා ප්‍රාඥයන් වන භාරත ඍෂි උතුමන් මීට වර්ෂ 5,000කටත් වඩා අෑත අතීතයේදී කියා දුන් ඉපැරැණි 'මහා වාස්තු' රහස් ගණනාවක් ඔබගේ ජීවිතයේ ධන වාසනාව ළඟා කරගැනීමට කැමැති ඔබ වෙත කියා දෙන්නම්. ශ්‍රී ලංකාවේ මෙතෙක් කිසිම වාස්තු ශිල්පියකු විසින් හෙළි නොකළ වාස්තු ශිල්පයේ 'මහා වාස්තු' මූලධර්ම ඔබගේ ජීවිතයේ සාර්ථකත්වය උදෙසා ඔබ වෙත නිර්ලෝභීව කියා දීමට මා සූදානම්.
මහා වාස්තූ මූලධර්ම යනු මෙනවාද?
ඔබ සාමාන්‍යයෙන් මේ වන විට අසා ඇත්තේ වාස්තු විද්‍යාවේ වාස්තු මූලධර්ම පිළිබඳ පමණක් වේ. ඔබ පමණක් නොව ශ්‍රී ලංකාවේ බහුතර වාස්තු ශිල්පීන් පවා දන්නේ වාස්තු විද්‍යාවේ පවතින පොදු මූලධර්ම පමණි. එසේ වුවද වාස්තු ශිල්පය තුළ ප්‍රධාන කොටස් දෙකක් ඇති බව ඔබ මුල්වරට අද දැනගන්නවා ඇති. මෙම හෙළිදරව්ව ජනමාධ්‍යයකින් හෙළිවන මුල්ම අවස්ථාව මෙය වන අතර එම කරුණු ඔබගේ නෙත ගැටීමට තරම් ඔබ වාසනාවන්ත බවද වටහා ගන්න. වාස්තු ශිල්පයේ පවතින ප්‍රධාන කොටස් දෙක පිළිබඳ ඔබට මම සරලව කියා දෙන්නම්.
- වාස්තු ශිල්ප මූලධර්ම
- මහා වාස්තු මූලධර්ම
වාස්තු මූලධර්ම තුළ අපට හමුවන වාස්තු සිද්ධාන්තවලට වඩා ගැඹුරට දුවන සිද්ධාන්ත ගණනාවක් 'මහා වාස්තු' තුළ දක්නට ලැබෙනවා. මෙය හරියට බුදුදහම තුළ ගැබ්වී ඇති අභිධර්මය වැනි වූ කොටසක් ලෙස ඉතාමත් සරලව ඔබට පෙන්වා දිය හැකියි. වාස්තු ශිල්පයේ අගතැන්පත් වූ විශ්වකර්ම හෙවත් විෂ්ණු දෙවියන් විසින් මහ වාස්තු ලෝකයට දායාද කර ඇති බව 'මහා වාස්තු' ඉතිහාසයේ සඳහන් වේ. භාරත දේශයේ සෘෂි උතුමන් දායාද කළ මෙම 'මහා වාස්තු' සිද්ධාන්ත නූතනයේ භාරත දේශය තුළද අතුරුදන්ව ඇති අතර එය හරියට බුදුදහම උපන් ඉන්දියාවේ පිරිසුදු ථෙරවාදය නොමැති වූවාට එය ශ්‍රී ලංකාව තුළ අදත් සුරැකිව ඇති සේම 'මහා වාස්තු' බිහිවූ භාරත දේශයේ පවා නොමැති 'මහා වාස්තු' මූලධර්ම ශ්‍රී ලාංකිකයන්ගේ වාසනාවට ශ්‍රී ලංකාව තුළ ඇති බව දන්නේ අල්ප දෙනෙක් පමණි. බුදු සසුන ආරක්ෂා කිරීමට ලංකාව භාරගත් විෂ්ණු දෙවියන්ගේ මහා වාස්තු ඉපැරැණි ග්‍රන්ථ රත්නයන් ශ්‍රී ලංකාදීපය තුළ අද ද සුරැකිව ඇති බව සතුටට කරුණකි.
ධන වාසනාව එන්නේ නිවෙසේ ප්‍රධානදොරෙන් නොවේ ඊශාන දිශාවෙනි.
'මහා වාස්තු' මූලධර්මයන්ගෙන් ප්‍රතිඵල ලබාගන්නා ඉන්දීය ධනවතුන් තමන්ගේ ධන වාසනාව ප්‍රධාන දොරෙන් එනතුරු බලා සිට මුළාවන්නේ නැති බව කිව යුතුයි. ප්‍රධාන දොර ධන වාසනාව එන බව පැවැසුවද සාමාන්‍යයෙන් නිවෙසක ප්‍රධාන දොර ඇර තිබෙන්නේ පැය කිහිපයක් පමණයි. සමහර නිවාසවල මුළු දවසම ප්‍රධාන දොර වහලා. සමහර නිවාසවල මුළු සතියම මුළු මාසයම දොර වහලා. ඉතින් කොහොමද එහෙම ගෙවල්වල අපට ධන වාසනාව ලබාගන්නේ. එසේනම් ධන වාසනාව නිවෙසට ඇතුළුවන නිශ්චිත ස්ථානය 'මහා වාස්තු'වලට අනුව නිවැරැදිව හඳුනා ගනිමු. ඔබගේ නිවෙසට ධන වාසනාව ගලා එන්නේ නිවෙසේ ඊශාන දිශාවෙනි. එය එන්නේ නිවෙසට ඉහළින් අංශක 45ක කෝණයකින් බව දැනගන්න. එසේ නිවෙසට ඇතුළුවන 'විශ්ව ශක්තිය' ඔබට ධන වාසනාව කැන්දාගෙන එනු ලබනවා. ශ්‍රියා කාන්තාව ලක්ෂ්මි නිවෙසට 'විශ්ව ශක්තිය' සමඟ එන්නේ ඊශාන අංශක 45 කෝණයකින් බව නිවැරැදිව දැනගන්න.
ධන වාසනාව රැගෙන එන විශ්ව ශක්තිය ධන වාසනාව වැඩි කරගැනීමට කළ යුතු දෑ :
ඔබගේ නිවෙසට ඊශාන දිශාවේ ඉහළින් ඇතුළු වන විශ්ව ශක්තිය ගෘහයේ හරිමැදට එනම් බ්‍රහ්ම පාදයට පතිත වේ. එය ශක්තියක් බැවින් නිවෙසේ බ්‍රහ්ම පාදය එම ශක්තිය ඇද ගැනීමට අවශ්‍ය ලෙස බලවත් කළ යුතු වෙනවා. ඊශාන දිශාවෙන් ගෘහයට පතිත වන විශ්ව ශක්තීන් නිවෙසේ හරි මැද එනම් බ්‍රහ්ම පාදයට එකතු වන අතර එම විශ්ව ශක්තිය වැඩි කරගැනීමට ඔබ සූදානම් වන ප්‍රමාණය අනුව ඔබගේ නිවෙසේ විශ්ව ශක්තිය වැඩිවී ඔබට ධන වාසනාව නොඅඩුව ලැබෙනු ඇත. ඔබ කළ යුත්තේ ලක්ෂ්මි දේවියගේ ශක්තිය උපරිම වන ලෙස නිවෙසේ මැද සකස් කොට තිබීමයි.
ධනය වැඩි කිරීමට නිවෙසේ මැද කෙසේ සකස් කළ යුතුද?
පළමුව ඔබ ඔබගේ නිවෙසේ මධ්‍ය ලක්ෂය නිශ්චිතව හඳුනාගත යුතුයි. එම ස්ථානය නිදහස් සහ පිරිසුදු ලෙස තබා ගත යුතු අතර මධ්‍ය ලක්ෂයට අවහිර වන කිසිම කටයුත්තක් නොකළ යුතුයි. මධ්‍ය ලක්ෂය අවහිර වුවහොත් නිවෙසට ධන වාසනාව අහිමි වන අතර ඔබට ලක්ෂ්මි දෙවියන්ගේ උදව් උපකාර අහිමි වී යනු ඇත.
උපුටා ගැනීම මව්බිම
