ඊශාන සහ නිරිත දිශාවෙන් නිවසට විදුලිය සම්බන්ධ කරන්න එපා
වාස්‌තු ශිල්පය තුළ සෑම විටම බලවත් වන කරුණු දෙකක්‌ තිබෙන බව ඔබ දන්නවා. එනම් භෞතික පැතිකඩ සහ ආධ්‍යාත්මික පැතිකඩ එම කරුණු දෙකයි. එසේම මෙම කරුණ දෙක සෑම විටම රඳා පවතින්නේ විශ්ව ශක්‌තිය මතයි. මෙහිදී වාස්‌තු විද්‍යාව තුළ "ශක්‌තිය" නැත්නම් "බලය" පිළිබඳව විශේෂ අවධානයක්‌ යොමු වෙනවා. නවීන විද්‍යාව මගින්ද අනාවරණය කරගෙන ඇති පරිදි ශක්‌තිය, ක්‍ෂෙය නොවන අතර සිදු වන්නේ, ශක්‌තිය මාධ්‍යයෙන් හෝ මාධ්‍යයට මාරු වීම පමණයි. වාස්‌තු ශිල්පයේ ප්‍රබලව දැක්‌වෙන සිද්ධාන්ත සියල්ල සකස්‌ වී ඇත්තේ මෙම ශක්‌ති විතැන් වීමේ පරාසයන් තුළ පවතින වෙනස්‌ වීම් පිළිබඳව ඉතාමත් සියුම් ලෙස අධ්‍යයන කිරීමෙන් බව පැහැදිලි වෙනවා. විශ්ව ශක්‌ති සම්ප්‍රේක්‍ෂණ රේඛාව ලෙස හඳුන්වනු ලබන ඊශාන, නිරිත මධ්‍ය රේඛාව ඉතා ප්‍රබල බව කිව යුතු අතර ගෘහයක ජනනය වන හොඳ හෝ නරක ශක්‌තීන්ගේ රටාව තීරණය වන්නේ මේ තුළිනි. මෙම ලිපියෙන් ඔබගේ අවධානය යොමු කරවීමට උත්සහ ගන්නේ ඔබගේ ගෘහයට සම්ප්‍රේක්‍ෂණ වන විශ්ව ශක්‌තියට බාධා ඇති නොවන ලෙස බාහිර බල ශක්‌තීන් සම්බන්ධ කරන ආකාරය පිළිබඳව ඔබගේ දැනුම පුළුල් කිරීමයි.
ඊශාන හෝ නිරිත දිශාවෙන් නිවසට විදුලිය සම්බන්ධ කරන්න එපා නූතනයේ ගෘහයකට අත්‍යවශ්‍ය බල ශක්‌තියක්‌ ලෙස විදුලි බලය පෙන්වා දිය හැකියි. අතීතයේ දී ගෘහයක්‌ ආලෝකවත් වූයේ ස්‌වභාවික තෙල් ආශ්‍රයෙන් වූවත් නූතනයේ දී විදුලි බලය ප්‍රධානතම බලශක්‌ති මාධ්‍ය බවට පත්වී තිබෙනවා. ඔබගේ ගෘහයට ප්‍රධාන විදුලි මෙනුව සකස්‌ කිරීම සඳහා ඉතාමත් සුදුසු දිශාව වන්නේ වයඹ දිශාව සහ ගිණිකොණ දිශාවයි. එසේම දකුණ, බටහිර, උතුර හා නැගෙනහිර දිශාවෙන් ද අයහපත් නොවන අතර නිරිත සහ ඊශාන දිශාවලින් කිසිම විටක නිවසට ප්‍රධාන විදුලිය සම්බන්ධය සිදු නොකළ යුතු වේ. ප්‍රායෝගිකව ඔබට වෙනත් දිශාවන් යොදා ගත නොහැකි විටක දී ඔබ ඊශාන දිශාවෙන් හැකිතාක්‌ දකුණු පැත්තටත් නිරිත දිශාවෙන් වම් පැත්තටත් වන්නට විදුලිය නිවසට සම්බන්ධ කිරීම කළ යුතු අතර ඊශාන හා නිරිත මධ්‍ය රේඛාවට හසු නොවන ලෙස විදුලිය සම්බන්ධ කිරිම කළ යුතු වේ. ඔබගේ නොදැනුවත් කමින් ඊශාන හෝ නිරිත දිශාවලට විදුලිය සම්බන්ධ කළහොත් නිවසට ස්‌වභාවිකව කාන්දුවන විශ්ව ශක්‌තිය දුර්වල වී එහි අයහපත් ප්‍රතිඵල නිතැතින් දැනෙනු ඇත. මීට අමතරව ඔබගේ ගෘහයේ බෙදා හැරීමේ පද්ධතිය (D බෝර්ඩ්) කිසිම විටක බ්‍රහ්ම පාදය ආසන්නයේ සවි නොකළ යුතු වේ. මේ නිසාද ගෘහයේ බ්‍රහ්ම පාදය දුර්වල වීම සිදුවන අතර ඍජුව ගෘහ හිමියාට එහි අයහපත් බලපෑම් එල්ල වීම දක්‌නට පුළුවන්. විශේෂයෙන් මධ්‍යම මෙහෙයුම් පද්ධතිය සඳහා දකුණු, බටහිර, වයඹ, ගිණිකොණ යන දිශාවන් ඉතාමත් උචිත වන අතර උතුරු හා නැගෙනහිර මිශ්‍ර ඵල සහිත වේ. ඊශාන හා නිරිත යොදා නොගත යුතු අතර නිවස මධ්‍යය ද යොදා නොගත යුතුයි.
බාහිර බලශක්‌ති සම්බන්ධිත චක්‍රය බාහිර බල ශක්‌ති ගෘහයට සම්බන්ධ කිරීමේ දී ඉහත සඳහන් චක්‍රයට අනුපාතව කටයුතු කිරීමෙන් ඔබගේ ගෘහයේ විශ්ව ශක්‌තිය බලවත් කරගත හැකි අතර එයට පටහැනි වන සෑම විටකම විශ්ව ශක්‌තිය දුර්වල වන බව කිව යුතුයි. ඔබගේ ගෘහයට විදුලි බලයට අමතරව සම්බන්ධ කරනු ලබන අනෙකුත් ශක්‌තීන් සම්ප්‍රේක්‍ෂණ රැහැන් පිළිබඳව ද විශේෂ අවධානයක්‌ යොමු කිරීම ඉතා වැදගත් වේ. මෙහිදී දුරකථන, රූපවාහිනි සහ ඇන්ටනා ආදියද ගෘහයට සම්බන්ධ කිරීමේ දී මෙන්ම විදුලි ජනක යන්ත්‍ර භාවිතා කිරිමේ දීද ඔබ ඉහත සිද්ධාන්ත වලට අනුකූල කටයුතු කළ යුතු වේ. නූතනයේ රටේ වේගයෙන් ව්‍යාප්ත වන විකල්ප බලශක්‌ති මූලයන් වන සූර්ය තාප පැනල් සවිකිරීමේ දී ඔබ වඩාත් සැලකිලිමත් විය යුතුයි. එහිදී ද ඒවා ඊශාන හා නිරිත දිශාවෙන් බැහැරව සවිකළ යුතු අතර කිසිම විටක වහලයේ මධ්‍ය කොටස භාවිතා නොකිරීම වගබලා ගත යුතුයි. සන්නිවේදන කුළුණු ගැන සැලකිලිමත් වන්න. ඔබ ගෘහයක්‌ සෑදීම සඳහා ඉතාමත් තෝරා ගන්නා අවස්‌ථාවේ දී බාහිර පරිසරයේ ඇති ශක්‌ති සම්ප්‍රේක්‍ෂණ කරන ස්‌ථාන පිළිබඳව විශේෂ සැලකිල්ලක්‌ දැක්‌විය යුතුයි. මෙහි දී බහුල වශයෙන් අපේ රටේ ඉදිකර ඇති සන්නිවේදන කුළුණු පිළිබඳව ඔබගේ අවධානය යොමු විය යුතුයි. එහි දී සන්නිවේදන කුළුණු ආසන්නයේ තිබෙනම් ඔබගේ නිවසට ඊශාන දිශාවෙන් ඇති එවැනි කූළුණු ගෘහයට කිසිසේත්ම යහපත් නොවන බව පෙන්වා දෙමි. ඊශාන දිශාව හැර අනෙක්‌ ඕනෑම දිශාවකින් එවැනි සන්නිවේදන කුළුණු තිබීමෙන් ගෘහයට කාන්දුවන විශ්ව ශක්‌තියට කිසිම බාධාවක්‌ සිදු නොවන බව මතක තබා ගන්න. ඔබත් ඔබගේ ඉඩමට දැනටමත් ඊශාන දිශාවෙන් එවැනි සන්නිවේදන කුළුණක්‌ තිබෙනවා නම් ඔබගේ ගෘහයේ වහලය නිසි පරිදි සකස්‌ කර ගැනීම තුළින් ගෘහයේ විශ්ව ශක්‌තිය බලවත් කිරීමේ හැකියාව පවතිනවා. එවැනි නිවාස සඳහා පල හතරේ වහලවල් යෙදීම ඉතාමත් සාර්ථක ක්‍රමයක්‌ බව පෙන්වා දෙමි.
එසේම මුළුතැන්ගෙය ගිණිකොණ දිශාවෙන්ම යෙදිය යුතු අතර ගෘහයට සුමුඛ නැමති උතුරු, දකුණු හා නැගෙනහිර දිශාවන්ගෙන් ද්වාර යෙදීම මැනවි. මීට අමතරව ඔබගේ ගෘහයේ විශ්ව ශක්‌තියට හානි නොවන ලෙස ගෘහ අභ්‍යන්තරයෙන් භාණ්‌ඩ ස්‌ථාන ගත කළ යුතු පිළිවෙල පහත පරිදි සකස්‌ කර ගැනීම කළ හැකි අතර එවැනි දෑ කිසිම විටක නිවසේ මධ්‍ය කොටසේ ස්‌ථාන ගත නොකළ යුතු වේ.
- රූපවාහිනි - දකුණ, ගිණිකොණ, වයඹ, බටහිර
- AC යන්ත්‍ර වයඹ, ගිණිකොණ, දකුණ
- ඇන්ටනා - දකුණු, නැගෙනහිර, වයඹ, උතුර
- විදුලිජනක යන්ත්‍ර- ගිණිකොණ, වයඹ, බටහිර, දකුණ
- ගෑස්‌ සිලින්ඩර් හා ලිප් - ගිණිකොණ, වයඹ, දකුණ
- ශීතකරණ - වයඹ, නැගෙනහිර, උතුර, දකුණ
- රෙදි සෝදන යන්ත්‍ර-වයඹ, උතුර, දකුණ, නැගෙනහිර
ඉහතින් දක්‌වා ඇති විදුලි උපකරණ හා භාණ්‌ඩ ඔබගේ ගෘහයේ ස්‌ථාන ගත කිරීමේ දී ඒවා ස්‌ථාන ගත කළයුතු පිළිවෙළ පිළිබඳව නිරවුලව දැන ගත යුතුයි. මෙහිදී මෙම උපකරණ ස්‌ථාන ගත කිරීම කළ යුතු දිශාව දක්‌වා ඇත්තේ ඒවා තිබෙන පරිශ්‍රයේ දිශාව අනුව වේ. නිදසුනක්‌ ලෙස සාලයේ රූපවාහිනි තිබිය යුත්තේ එම සාලයේ දකුණු, ගිණිකොණ, වයඹ, බටහිර දිශාවට විය යුතුයි. එසේ වුවද ඔබට ප්‍රායෝගිකව සමහර විට ඒවා නිසි පරිදි ස්‌ථාන ගත කිරිමට නොහැකි වන අවස්‌ථා තිබිය හැක. එහිදී හැකි පමණින් දිශානුගතකරණයට එකඟවීම ප්‍රමාණවත් වන අතර කිසිම විටක නිවසේ බ්‍රහ්ම පාදය මත එවැනි දෑ නොතැබීමට වගබලා ගත යුතුයි. වැරදි ලෙස බල ශක්‌ති උත්පාදන යන්ත්‍ර තිබීමේ ප්‍රථිපල ඉහතින් පෙන්වා දුන් ආකාරයට පටහැනි ලෙස ඔබගේ ගෘහයේ බල ශක්‌තිය සමඟ ක්‍රියාත්මක වන භාණ්‌ඩ හෝ උපකරණ ආදිය යෙදී ඇති විටක ඔබට යම් යම් අපහසුතා නිතර දැනෙනු ඇත.
- නිවසේ අනතුරු බහුල වීම
- සතුරු කරදර බහුල වීම
- ගෘහයේ සාමයට හානී සිදුවීම
- වියදම් බහුල වීම
- භාණ්‌ඩ වලට නිතර හානී සිදුවීම
ඉහතින් ඔබ වෙත පෙන්වා දුන් ආකාරයට ගෘහයේ විශ්ව ශක්‌තියට හානී නොවන ලෙස බල ශක්‌තිය ගෘහයට සම්බන්ධ කිරීම සහ විදුලි උපකරණ භාවිතය තුළින් ඔබගේ ගෘහ සොබාදහමට එකඟ විශ්ව ශක්‌තිය දුර්වල නොවූ නිවසක්‌ බවට පත් කර ගැනීමේ වාසනාව සහ හැකියාව ඔබට ලැබෙනු ඇත. සියල්ලට පෙර සියලූ දෙය ක්‍රමවත්ව සකස්‌ කර ගැනීම සියලු යහපත පිණිස හේතු වන බව ඍෂි මතයයි.
වාස්‌තුවිද්‍යා විශාරද කීර්ති, ඩී. යු. සෙනරත්
උපුටා ගැනීම දිවයින
