සුබ මොහොතින් නව නිවසට ගෙවදින්න
ගෙයක්‌ හදාගැනීම අතිදුෂ්කර දෙයකි. ඒ සල්ලි බාගේ අමාරු මිනිසුන්ටය. එසේ වුවත් ණය වී හෝ තම අයස්‌තය වැයකර හෝ මිනිස්‌සු ගෙයක්‌ දොරක්‌ හදාගන්නට සමත් වෙති. ගෙය ගොඩනගන්නට අත්තිවාරමට ලණු අදින තැන පටන් සුබ නැකැත්වලට සියලුම වැඩ අරඹා අවසාන වශයෙන් ගෙට ගෙවදීමේ නැකත තනාගැනීමෙන් පසු ගේ සම්බන්ධ නැකැත් කටයුතු අවසන් වෙයි. දස දහසක්‌ බලාපොරොත්තු හිත ඇතුළේ ගොනුකරගෙන අත්තිවාරම කැපීමේ මුල්ම පියවරට අයත් වන නැකතකට ලණු ඇදීමෙන් පසු අවසානයට ගෙවදීමේ නැකත ද ඉතාමත් වැදගත් අවස්‌ථාවක්‌ වෙයි. මේ ලිපියෙන් ඔබ දැනුවත් කරන්නේ එම නැකත සකස්‌ විය යුතු අන්දම මෙන්ම ගෙවදීමේදී පිළිපැදිය යුතු චාරිත්‍ර වාරිත්‍ර සම්බන්ධයෙනි.
- ගෙහිමියාගේ භාර්යාව හෝ ළඟම ඥතියෙක්‌ ගර්භණී අවස්‌ථාවක සිටියදී ගෙවදීම සිදුකිරීම අසුබදායක බව පළමුවෙන් අවබෝධ කළ යුතුය.
- තම නිවසේ ප්‍රධාන දොර නැගෙනහිර දිසාවට පිහිටා තිබේ නම් උදේ 06 මධ්‍යහ්න 12 ත් අතර නැකතක්‌ තනාගැනීම සුබදායකයි.
- එසේම ප්‍රධාන දොර දකුණු දිසාවේ නම් පස්‌වරු 01 සිට රාත්‍රි 11 දක්‌වා සුබ මුහුර්ථය තනාගැනීම යෝග්‍ය වෙයි.
- බස්‌නාහිර දිසාවට නම් රාත්‍රි 7 ත් අලුයම 5 ත් අතර කාලය සුබ වේ.
- උතුරු දිසාවට දොර පිහිටියේ නම් අලුයම 1 ත් දහවල් 11 ත් අතර සුබ නැකතක්‌ යොදාගැනීම ඉතා සුදුසු වේ.
- වෙසක්‌, පොසොන්, නවම්, මැදින් යන මාස ඉතාමත් සුබදායක වන අතර ඉල් - උඳුවප් යන මාස මධ්‍යම වශයෙන් සුබදායක වෙයි.
- පුර පක්‍ෂයට අයත් 2,3,5,7,10,11,13 යන තිථි පවතින දිනයන් ඉතාම සුබදායක වේ.
මෙසේ තනාගන්නා නැකතට අදාළ තත්කාල ලග්නයෙහි,
- සඳු 06-08-12 වැනි ස්‌ථානයක සිටීම ඉතාමත් අසුබදායකය.
- ගුරු - සිකුරු යන ග්‍රහයන් සුබවාදීව පිහිටා තිබීම මෙන්ම 04 වැන්න හෝ 04 වැන්න අධිපති පීඩාවී සිටීම අසුබදායක වෙයි.
- විශේෂයෙන් 11 වැන්න 2 වැන්න ලග්නාධිපති යන ග්‍රහයන්ගේ පිහිටීම් සැලකිල්ලට ගත යුතුය.
- 04 වැන්න හා එම අධිපති සුබ තත්ත්වයේ සිට 2 වැන්නාධිපති 11 වැන්නේත් 11 වැන්න අධිපති 02 වැන්නේ හෝ ලග්නාධිපති 11 වැන්නේ හෝ 02 වැන්නේ සිටීම හෝ 02 වැන්නාධිපති 05 වැන්නේ සිටීම වැනි ග්‍රහ සංයෝග තිබීමෙන් එම නිවැසියන් ධනවත්භාවයට පත්වේ.
- කුජ හෝ සෙනසුරු සියාවස - පුවපුටුප - බෙරණ - දෙනට යන නැකතක සිටියදී එකී නැකතකින් ගෙවදීමේ නැකත පිළිවෙල වුවහොත් එම නිවසේ අයට රෝග - මරණ බිය - සොර සතුරු උවදුරු ඇතිවන හෙයින් අසුබ දායක වේ.
- ගෘහමූලිකයාට ත්‍රිජන්ම වන නැකතක පාපි ග්‍රහයෙක්‌ සිටී නම් එම නිවැසියන්ට දුක්‌ කරදර ඇතිවිය හැකිය. තත්කාල ලග්නයෙහි ගුරු - බුද - සඳු - සිකුරු යන සුබ ග්‍රහයන් ලග්නයෙහි 04 වැන්නෙහි, 10 වැන්නෙහි සිටියේ නම් ඉතා සුබදායක වෙයි.
මේ අනුව ගෙවදීමේ නැකත තැනීමේදී ඉතාමත් සුපරීක්‍ෂාකාරී වීම ඉතා වැදගත් වෙයි. නව නිවහන තුළ ජීවත්වීමේ ආරම්භක නැකත කොටස්‌ දෙකකින් සමන්විත වෙයි. එනම් ගෙවදීම සහ ආහාර අනුභවය හෙවත් ගෙය අලෙවි කිරීම යන අවස්‌ථා දෙකය. මේ සඳහා නිවැසියන් විසින් පිළිපැදිය යුතු චාරිත්‍ර මනා ලෙස පිළිපැදීම ද සිදුවිය යුත්තකි. එය මෙසේ වෙයි. සුබ නැකතට ගෙවදීම කරන විට ගෙහිමියත් බිරිඳත් දූ දරු ආදීනුත් එම ගෙයි ජීවත්වන තවත් නෑ හිතවත් අය සිටී නම් ඔවුන් ද ගෙහිමියා පෙරටුකොටගෙන ඇතුල්විය යුතුය. ඒ සෑම කෙනෙක්‌ම ඇතුළු විය යුත්තේ හිස් අතින් නොවේ. තම තමන්ට රැගෙන යා හැකි සෑම දෙයක්‌ම දෙඅතටම රැගෙන ගෙට ඇතුළු විය යුතුය.
- ගෙහිමියා මිල මුදල් - රන් රිදී භාණ්‌ඩ මෙන්ම පිත්තල පහනක්‌ ද රැගෙන ගෙට ඇතුළු විය යුතුය. පහන ගේ තුළදී දැල්වීම සිදුකළ යුතුය.
- ගෘහණිය විසින් රැගෙන යා යුත්තේ කිරිබත් පිසීම පිණිස සෝදාගත් සහල් සහිත නැවුම් මුට්‌ටියක්‌, නැවුම් වතුර කළයක්‌ රැගෙන ඇතුළු විය යුතුය.
- සෙසු අය පොල්, කුළුබඩු, රස කැවිලි ආදී දේවල් ද රැගෙන ඇතුළුවීම වඩාත් සුදුසු වේ.
මෙසේ සුබ නැකතට ගෙට ඇතුළුවන සියලු දෙනා කල්වේලා ඇතිව ස්‌නානය කර හෝ ඇඟපත සෝදා හෝ පිරිසිදු ඇඳුම් ඇඳ සිටිය යුතු බව අමතක නොකරන්න. එසේම නිවසේ වාස්‌තුවලට අනුකූලව බුදු පහන දල්වන ස්‌ථානය පිළියෙළ කර තිබිය යුතුය. එම ස්‌ථානයේ දැල්වීමට සූදානම් කළ පහනක්‌ ද තිබිය යුතු බව අමතක නොකරන්න. වාස්‌තු අනුව බුදු පහන තබන ස්‌ථානය බොහෝ විට ගිනිකතුර හෙවත් (සෙන්ටර් පොයින්ට්‌) යනුවෙන් ඉංග්‍රීසි බසින් හඳුන්වන ස්‌ථානයට හසුවන බිත්තියේ වෙයි. මෙසේ සුබ නැකතට ඇතුළු වී ගෙහිමියා රැගෙන ආ පහන ගෙයි මැද තබා දැල්විය යුතුය. එම පහනේම ගින්දරෙන් බුදු පහන ද දල්වා බුදුන්ට නමස්‌කාර කළ යුතුය. පළමුවෙන් පහන දල්වන විට ගෙවැදුණු නැකතට හිමිව තිබූ දිසාව බලා පහන දැල්විය යුතුය. ගෘහණිය ද රැගෙන ආ සහල් සැලිය එම සුබ දිසාවම බලා ළිප තබා ගිනි මොලවා ගත යුතුය. ගේ තුළ ගිනි දැල්වීම සිදුවන්නේ සුබ නැකත තුළ ගෙට ඇතුළු වී ගෙහිමියා රැගෙන ආ පහන ගේ මැද තබා දැල්වීමෙන්ය. ඇතැම් විට ගිනි මෙලවීමට ද නැකත සාදන අවස්‌ථා තිබේ. එසේ වූ විට එම නැකත උදාවනතෙක්‌ සිට එම පහන දැල්වීමය. ඒ සමඟ ගෘහණිය ද ලිප ගිනි මෙලවිය යුතුය. එසේ කරන විට කිරි ඉතිරවීමත් කිරිබත් පිසීමත් එකවර කළ හැකිය. මෙය මුළුතැන්ගෙයි සාදාගත් ළිපේම කිරීම ඉතා සුදුසුය.
නිවසක සුබම ස්‌ථානය මුළුතැන්ගේ හෙවත් කුස්‌සිය වෙයි. එහි අභිනවයෙන් තනා ඇති ළිපේම කිරි ඉතිරවීම යෝග්‍ය වේ. ඉතිරෙන කිරි ස්‌වල්පයක්‌ බඳුනකට රැගෙන එය ගසක කුඩා අතු කැබැල්ලකින් ගේ පුරා ඉසීම සුබ වේ. එම කිරි ඉසින අවස්‌ථාවේ ජය පිරිත සංඝායනා කරමින් ඉසීම වඩාත් සුබදායකය. කිරි ස්‌වල්පයක්‌ එසේ ගත් සැනින් මුට්‌ටියට සහල් දමා නැවත මදිනම් කිරි ස්‌වල්පයක්‌ ද එක්‌කර කිරිබත පිළියෙළ කරගත යුතුය. නැවුම් වතුර කළයෙන් පැන් ගෙන කෙණ්‌ඩියක්‌ පුරවා සකස්‌ කළ මේසය මත තබා කැවිලි ආදිය ද එහි තැන්පත් කරගත යුතුය. රැගෙන ආ වෙනත් බඩු බාහිරාදිය ද නිසි තැන්වල තැබිය යුතු වේ. කිරිබත සකස්‌ කර එය ද මේසය මත තබාගන්න. විශේෂයෙන් එදින මස්‌ මාංශ පිලී වර්ග ගෙතුළට රැගෙන ඒමෙන් වළකින්න.
ඊළඟට දෙවන නැකත උදාවන අවස්‌ථාවයි. එනම් තමන් ආරාධනය කළ පුද්ගලයාට කෑම මේසය පිළිගැන්වීමය. එනම් ගෙය අලවි කිරීමට යන මොහොත. මස්‌ මාංශ මත්පැන්වලින් තොරව එසේ කැවිලි කිරිබත්, පලතුරු හෝ නිර්මාංශ ව්‍යංජන ආදී දේවලින් මේසය සරසා පොල්තෙල් පහනක්‌ ද නොදල්වා මේසය මත තබන්න. පසුව ආරාධිතයාට වතුර අල්ලා ආරාධනය කරන්න. නැකැත් වේලාවට නිසි දිසාව බලා ආරාධිතයා පැමිණ මේසයේ තබා ඇති පහන දල්වා වාඩි වූ විට ගෙහිමියන් විසින් කෑම බෙදා පිළිගැන්විය යුතුය. මෙසේ ආහාර අනුභවයෙන් පසු ආරාධිතයා තෑගි බෝග පිරිනමා ආපසු යැමට පෙර රස කැවිලි පාර්සලයක්‌ හෝ ගෙහිමියා තෑගි කළ යුතුය. මෙසේ කිරීමෙන් පසු අනෙකුත් ආරාධිතයන්ට සංග්‍රහ කටයුතු කැමති අන්දමට සංවිධානය කරන්න. එසේ පළමු ආරාධිත පුද්ගලයා තම දියුණුවට අකුල් නොහෙලන, ඊර්ෂ්‍යා, වෛර, ක්‍රෝධවලින් දුරු වූ යහපත් කෙනෙක්‌ වීම ඉතාම යෝග්‍ය වේ. එසේම මෙම කරුණ ද ඉතා වැදගත්ය. එම ආරාධිත පුද්ගලයාගේ කේන්ද්‍රයේ ගුරු ග්‍රහයා උපතින් 04 වැන්නේ සිටී නම් ඔහු සැබවින්ම යහපත් පුද්ගලයකු වෙයි. නමුත් ඒ බව දැනගැනීම එවැනි දේකට අමාරුය. කුණු වැරහැලි ඇඳගත් අය, යාචකයන් එදින නව නිවස තුළට ගෙන සංග්‍රහ කිරීම නුසුදුසු බව පැවසේ. මෙම චාරිත්‍ර ඔබ වෙත ඉදිරිපත් කිරීමේදී පැරණි සම්ප්‍රදායන් සේම සෝමසිsරි ජයවර්ධන ලියූ "සුබ මොහොත හා නැකත
" යන ග්‍රන්ථය ද පරිශීලනය කර ඇති බව සඳහන් කරමි.
අගලවත්තේ බී. හේරත්උපුටා ගැනීම දිවයින
