පියාට මාරක ගෙනදුන් මංගල බිත්තිය
නිවෙසක ගෘහමූලිකයා හෙවත් පියා එම නිවෙසේ මූර්තියයි. තම දරු පවුලට යහපත් දිවි පෙවෙතක් උරුම කිරීමට සිතා ඩිනාර් සොයා දුරු රට ගිය එක් පියකුගේ ශෝචනීය කතාවයි මේ.
විවාහයෙන් පසු දරුමල්ලන් ලැබ ඔවුන් සමඟ තම බිරිය මහගෙදර දිවි ගෙවූ මෙම පියා වරින් වර වසර 20ක් පමණ කාලයක් විදෙස් ගතව සිටිය අයෙකි. වඩාත් සතුටින් සිටීමට විදෙස් ගතවී උපයාගත් මුදලින් ඔවුන්ටම අයත් නිවෙසක් තැනීමට මෙම පියා කටයුතු කළේය. නමුත් නිවෙසේ පදිංචි වී වසර 1 1/2ක් පමණ වනවිට මුදල් අඩුපාඩුකම් දැනුණු හෙයින් නැවැතත් ඔහු විදේශ ගතවිය. විදෙස් ගතවී වසර 2කින් පමණ නැවැතත් මෙරටට පැමිණ, දීර්ඝකාලීනව මෙරට වාසය කිරීමට සිතුවත් ඒ අතරතුර අවාසනාවකට මෙන් හදිසි අනතුරකින් සුෂුම්නාවට හානි වී ඔහුගෙන් මතකය ගිලිහී ගොස් තිබිණි. මෙරටට පැමිණ වසර ගණනක් එක්තැන්ව දිවි ගෙවීමට ඔහුට සිදු විය. මා එම නිවෙසේ වාස්තු පරීක්ෂා කිරීමට යනවිට ගෘහමූලිකයා මියගොස් තිබිණි. ගෘහමූලිකයාට මෙවන් ඉරණමක් අත්වීමට හේතු සාධක වූ වාස්තු දෝෂ සහ ඒවාට මා යෙදූ පිළියම් මෙසේය.
නිවෙසේ මංගල බිත්තියේ පිහිටි කුරුස පාදම නිවෙසක මංගල බිත්තිය යනු ගෘහමූලිකයාගේ කොඳු නාරටියයි. එය පීඩා වීමෙන් ගෘහමූලිකයාට පිටකොඳු නාරටිය ආශ්‍රිත රෝගාබාධ ඇතිවේ. නැතහොත් නිවෙසේ ගෘහමූලිකයා හදිසි අනතුරුවලින් ඔත්පළ කරයි. මෙම නිවෙසේ මංගල බිත්තිය සමඟ කුරුස පාදමක් වැටී තිබිණි. එමඟින් ගෘහමූලිකයාගේ සුෂුම්නාවට හානි සිදු විය. පසුව කුරුස පාදම මහපොළොවෙන්ම ගලවා පසෙන්ම ඉවත් කෙරිණි. ඊසානයේ පිහිටි වැසිකිළි වළ මෙයද නිවැසියන්ගේ කායික පිරිහීමට හේතුවක් විය. ඊසානයට ශුභ වන්නේ බුදු කාමරයයි. ඊසානයට අසූචි වළ හා කුණු වතුර වළ යෙදූ නිවෙස්වල නිවැසියන්ගේ කායික හා මානසික පිරිහීම ඇති කරයි. අසූචි වළ ගලවා එම ස්ථානයෙන් ඉවත් කෙරිණි. අනෙකුත් ඉඩම්වල සහ පාර සෝදාගෙන එන වැසි ජලය බැස යන්නේ මෙම ඉඩමෙනි. එයද නිවැසියන්ගේ ජීවිතවල හිස් බව ඇති කිරීමට ප්‍රබල හේතුවක් විය. එමෙන්ම මෙම අප ජලය ගලා ගියේ නිවෙසේ ප්‍රධාන දොර ඉදිරිපිටිනි. මෙය විශේෂයෙන් ගෘහ මූලිකයාගේ විනාශයට පිරිහීමට හේතුසාධක ඇතිකරන්නා වූ පිහිටීමකි. ඉඩම පස් පුරවා ගොඩ කිරීමෙන් හෝ කානුවක් සැකැසීමෙන් මෙම දෝෂය වළක්වා ගැනීමට උපදෙස් දිනි. මෙම උපදෙස් අනුව නිවෙස ප්‍රතිසංස්කරණය විණි. දැන් නිවෙසේ පසුවන වැඩිමහල් පුත්‍රයා සාමකාමී දිවි පෙවෙතක් ගෙවයි. නමුත් ඔවුන්ගේ ආදරණීය පියාගේ ශෝචනීය ඉරණම අඳුරු පැල්ලමක් සේ ඔවුන්ගේ ජීවිතවල කවදාටත් පැලපදියම්ව තිබේ.
අමාලි අගස්පතිරණ ජේ‍යාතිෂ ශිරෝමණී ජේ‍යාතිෂ පරම හංස ජේ‍යාතිෂ ඩිප්ලෝමා වාස්තු විද්‍යා සැලසුම් ශිල්පී 071 - 0605798
උපුටා ගැනීම මව්බිම පුව්ත්පත
