ප්‍රධාන දොරෙන් ගෙට එන වේධ දොෂ නැත්නම් දොෂ නිවාරණයි
නිවෙසක ප්‍රධාන දොරටුව හා සම්බන්ධව සිදුවිය හැකි මෙම වේධ දෝෂයන් ගැන අතීතයේ ඍෂිවරු කියා තිබූ දේ අදටත් ඒ ආකාරයටම සත්‍යයක් වෙන බව ඔබට මෙයින් වැටහේවි.
01. ස්තම්භ වේධ දෝෂය
නිවෙසේ ප්‍රධාන දොරට ආසන්නව හා ඊට කෙළින්ම කණු පිහිටීමෙන් මෙම දෝෂය ඇති වෙනවා. මෙම කුලුනු, නිවෙසින් එළියට බහින ඔබට බාධකයක් ලෙස ඉදිරියට හමුවෙන්න පුළුවන්. මෙවැනි නිවාසවල වාසය කරන ස්ත්‍රීන් ඇතැම් විට සමාජ විරෝධී ක්‍රියා, දුරාචාරයන් ආදියට යොමු වීමට ඉඩ තිබෙනවා.
02. වර්චස්ථාන වේධ දෝෂය
ප්‍රධාන දොරට ආසන්නව හා ඉදිරියෙන් අසූචි වළවල්, මල මුත්‍රා පහකරන ස්ථාන, කසළ වළවල් ආදිය තිබීමෙන් මෙම දෝෂය හටගන්නවා. අපිරිසුදු බව නිසා නිතර අසනීප, ලෙඩදුක් ඇතිවෙන්න පුළුවන්. නිවෙසේ සිරියාවටත් මෙය බාධාවක්. නිවැසියන් නිතර සිත් තැවුලින් ජීවත් වීමට ඉඩ ඇති අවාසනාවන්ත පිහිටීමක් වෙනවා.
03. රජක වේධ දෝෂය
නිවෙස ඉදිරියේ රෙදි සෝදන තැනක්, රෙදි අපුල්ලන තැනක් හෝ රදාතොටක් පැවැතීම මෙම දෝෂයයි. මෙවන් වූ නිවෙසෙක සිටින අය පහත් හෝ පටු අදහස්වලින් යුක්ත වීමත්, නිතරම පහළ මට්ටමේ රැකියා කිරීමට සිදුවීමත්, බලාපොරොත්තු වූ උසස් තනතුරු කිසිසේත්ම නොලැබී යෑමත් සිදුවෙන්න පුළුවන්. කිලිටි රෙදි සෝදන තැනක් නිසා ගෙදර සිරියාවන්ත බවට නම් ලොකු තර්ජනයක් වෙනවා. අපිරිසුදු ජලය නිවෙස ඉදිරිපිටින් ගලා යෑම හෝ රැඳීම සිදුවෙන නිසා ඒක දියුණුවටත් බාධාවක්.
04. කුම්භාකාරක වේධ දෝෂය
ගෙදර ප්‍රධාන දොරට ඉදිරියෙන් හා ඊට ආසන්නයේ ගඩොල්, උළු, වළං පෝරනුවක් තිබේ නම් මෙම දෝෂය ඇති වෙනවා. මෙවැනි ස්ථාන අසල අධික රස්නයක් තිබෙනවා. දර පළන සේවකයන්ගේ කෑකෝගසන ශබ්ද අසල නිවැසියන්ට මහත් හිරිහැරයක් විය හැකියි. මෙම දෝෂයේ ප්‍රතිඵලයක් ලෙස ඉඩකඩම් දේපළ පිළිබඳ ගැටලු, නඩුහබ, සොර සතුරු පීඩා ආදිය නිවැසියන්ට ඇතිවෙන්න පුළුවන්.
05.රාජ වේධ දෝෂය
නිවෙසේ ප්‍රධාන දොර ආසන්නයෙන් හා ඉදිරියෙන් තමාට වඩා නිලයෙන්, බලයෙන් උසස් රජයේ මැති ඇමැතිවරයකුගේ හෝ ප්‍රභූවරයකුගේ නිවෙසක්, කාර්යාලයක් වැනි තැනක් පිහිටීම මෙම දෝෂයට හේතුවයි. මෙමඟින් නිවැසියන්ගේ රැකියා, තනතුරු අහිමිවීම්, සතුරු හානි හා ආරක්‍ෂාව පිළිබඳ ගැටලු, නිදහස් බව හා පෞද්ගලිකත්වය පිළිබඳ ගැටලු ඇති වෙන්න පුළුවන්.
06. ගණිකා වේධ දෝෂය
නමේ අරුතින්ම සමාජ විරෝධී ක්‍රියා සිදුවන මෙවන් ස්ථානයක් නිවෙසක් ආසන්නයේ ඉදිරියෙන් තිබීම දෝෂයක් ලෙස වාස්තු විද්‍යාවේ සඳහන් වෙනවා. නිවැසියන් අතර අසමඟිය, අනවශ්‍ය සැකය, ඒවා කෙරෙහි යොමුවීම සිදුවෙන්න පුළුවන්. මිල මුදල් දේපළ විනාශය, දූදරු ආදීන්ගේ අකල් මරණ පවා සිදුවිය හැකියි. මෙය කලාතුරකින් දැකිය හැකි වේධ දෝෂයක්.
07. තිරශ්චීන වේධ දෝෂය
ප්‍රධාන දොරට ආසන්නයේ හා ඉදිරියෙන් ගව මඩුවක්, උෟරු මඩුවක්, කුකුළු කොටුවක්, පක්‍ෂි කූඩුවක්, බලු කූඩුවක් ආදිය තිබේ නම් මෙම දෝෂයට ලක්වෙනවා. මෙවන් ස්ථාන අපිරිසිදුයි. දුර්ගන්ධය, සතුන්ගේ කෑගැසීම් බාධාවක් වෙන්න පුළුවන්. ලෙඩ රෝගවලට අමතරව නිවැසියන් අනුවණ ක්‍රියා හෝ පහත් පෙළේ වැඩ කිරීමටත් පෙලැඹෙන්න පුළුවන්.
08. බ්‍රහ්ම වේධ දෝෂය
මෙම දෝෂය ආකාර කීපයකට සිදුවිය හැකියි.
- තමාගේ නිවෙසේ ඉදිරිපස බිත්තියේ හරි මැදට වන්නට ප්‍රධාන දොර පිහිටීම.
- නිවෙසේ ඉදිරිපස බිත්තිය මුදුන් බිත්තියක් වී ප්‍රධාන දොර එහි පිහිටීම.
- තමාගේ නිවෙසේ ඉදිරි බිත්තියේ හරි මැදට වන්නට, යාබදව ආසන්නයේ පිහිටි නිවෙසේ දොරක් තිබීම ආදියයි.
මෙසේ වීමෙන් නිවෙසේ අලංකාරයට, ගාම්භීර බවට යම් බලපෑමක් වෙන්න පුළුවන්. නිවැසියන්ගේ කීර්තිය නැතිවීමටත්, පරිහානියටත් මෙය හේතුවක් වෙන බව වාස්තු විද්‍යාවේ කියැවෙනවා.
09. ම්ලේච්ඡ වේධ දෝෂය
නිවාස ඉදිරිපිට සමාජ තත්ත්වයෙන් ඉතා අඩු අහිගුණ්ඨික වැනි පහත් මට්ටමේ අය ජීවත් වේ නම් මෙම දෝෂය ඇති වෙනවා. මෙවන් පිරිස්වල උගත් මට්ටම, සමාජ තත්ත්වය ඉතා අඩුයි. ඔවුන්ගේ චර්යාවන් පවා වෙනස්. මෙවන් පිරිසක් ඔබේ නිවෙස ඉදිරිපිට ජීවත් වේ නම් තමාගේ කීර්තියට සමාජ තත්ත්වයට කෙළින්ම බලපාන්න පුළුවන්. උත්සාහයේ තරමට ප්‍රතිඵල නොලැබීම, අපිරිසුදු බව නිසා ලෙඩ රෝග, ගෞරවය හීනවීම, සිරියාව අඩු වීම ආදිය දකින්න පුළුවන්. ඔබට වැදගත්ම දෙයක් කියන්නම්. ම්ලේච්ඡයන් කියන්නේ දුප්පතුන්ට නොවේ. මිල මුදල්, දේපළ අතින් දුප්පත්ව ඉපදී මනුෂ්‍යත්වය, උදාර ගති පැවැතුම් ආදියෙන් පොහොසත්ව ජීවත් වෙන උදවියත්, උපතින්ම ධනවත් වුණත් ගුණධර්ම, හැදියාව ආදියෙන් ම්ලේච්ඡව සිටිනා පෝසත් යැයි කියන අයත් අප අතර සිටින බව මේ කාරණා සමඟ මතක තබාගන්න.
මෙම වේධ දෝෂයන් පවතින්නේ නිවෙසේ උස මෙන් දෙගුණයක දුර ප්‍රමාණයක් ඇතුළතයි. එම දුර ප්‍රමාණය නිවෙසේ ඉදිරිපසින් සැලකිය යුතුයි. නිවෙසක දෙපසින් හෝ පිටුපසින් මෙම වේධ දෝෂයන්ගෙන් අසුබ ඵල ඇතිවෙන්නේ නැහැ. ඔබ නිවෙසක් සෑදීමට අදහස් කරනවා නම් මෙම වේධ දෝෂයන් මඟහැරී යන ආකාරයට ක්‍රියා කිරීම ඉතා වැදගත්. මොකද නිවෙස කියන්නේ පවුල් ජීවිතයට, අධ්‍යාපනයට, රැකියාවට, ව්‍යාපාරයට ආදී සෑම දෙයකටම බලපාන තැන නිසා. ඒ බව වාස්තු විද්‍යාවේ විශේෂයෙන් සඳහන් වෙනවා. ඉතින් ඔබ සාදන්නට යන නිවෙස සිරියාව කැන්දන, ධනය රන්දන, ලෙඩ දුක් කරදරවලින් අඩු වාසනාවන්ත නිවෙසක් කර ගැනීම ඔබ සතු දෙයක්. මෙයින් ඔබට සැලසෙන සෙත, අස්වැසිල්ල හා පිටිවහල අත්විඳීමට නම් දොසින් තොර සෙවණක් වෙතම සිත යොමුකළ යුතුයි.
සිවිල් ඉන්ජිනේරු වාස්තු විද්‍යාවේදී ගයාන් එරමුදුගොඩ 0727808809උපුටා ගැනීම මව්බිම පුවත්පත
