මොනවද මේ වේධ දොෂ
මාර්ග වේධ දෝෂය :
නිවෙසේ ප්‍රධාන දොරටුව ඉදිරියෙන් වංගුවක් සහිත මහා මාර්ගයක් තිබීමයි. වංගුවක් අසල ඇති නිවාසවලට වාහනවලින් සිදුවිය හැකි අනතුරු බහුලයි. කුඩා දරුවන් පාරට එන්න පුළුවන්. දූවිලි සහ වාහන දුම නිවෙස ඇතුළට එන්නේ නිරායාසයෙන්. කැරලි කෝලාහල ආදියෙන් පවා සිදුවිය හැකි අනතුරු බහුල පිහිටීමකි. වැසි දිනවලදී සිදුවිය හැකි රිය අනතුරු වාගේම සෝදාපාළුවට ලක්විය හැකි අශුභ පිහිටීමක් වෙනවා.
කර්දම/පංක වේධ දෝෂය :
ප්‍රධාන දොරටුව ආසන්නයේ, ඊට කෙළින් මඩගොහොරුවක් පිහිටීමයි. මඩවළක් කියන්නේ අපිරිසුදු තැනකට. නිතර ජලය පිරී දුගඳ හමන, මදුරුවන් - මැස්සන් ආදිය බෝවෙන්න පුළුවන්, තෙතමනය හා විසබීජ නිසා නිතරම ලෙඩ කරදර ඇතිවිය හැකි පිහිටීමක්. සෘෂිවරු මතය අනුව පවා විපත්, ලෙඩරෝග, කරදර, අසහනකාරී සිතිවිලි පහළ විය හැකි යැයි සැලකෙන අශුභ පිහිටීමක්.
වෘක්‍ෂ වේධ දෝෂය :
ප්‍රධාන දොරටුව ඉදිරියෙන්ම විශාල ගසක් පිහිටීම මෙම දෝෂයයි. මෙසේ පිහිටීම ඔබට බාධාවක්. නිසි ආලෝකය හා වාතාශ්‍රය නිවෙසට නොලැබී යා හැකියි. පල හටගන්නේ නම් වහලයටත්, නිවැසියන්ටත් අනතුරු සිදුවිය හැකියි. ගසේ මුල් නිසා බිත්ති ඉරිතැළීමත්, කොළ අතු ආදිය වැටීම නිසා වහලයත්, නිවෙස ඉදිරිපිටත් නිතරම පිරිසුදු කළ යුතු වෙනවා. මෙය අශුභ යැයි සැලකෙන තවත් පිහිටීමක්.
කූප වේධ දෝෂය :
ප්‍රධාන දොර ඉදිරියෙන්, එය අසලින්ම ළිඳක් පිහිටීමයි. ජලය පිරුණු ළිඳක් කියන්නේ නිවෙසකට සම්පතක්. නමුත් ළිඳ නිසා නිවෙසකට ඇතිවිය හැකි දෝෂයනුත් බොහොමයි. ළිඳ පිහිටන දිශාව නිවැරැදි වෙන්න ඕනෙ. නිවෙසේ අත්තිවාරම් කොන්, මුදුන් ලී, යටලී, බාල්ක ආදිය ළිඳ දෙසට වැටෙන්නත් බැහැ. ප්‍රධාන දොර ඉදිරියෙන් මෙසේ ළිඳක් පිහිටීම එක් අතකට අනාරක්‍ෂිත දෙයක්. ළිඳ කියන්නේ සම්පතක් වුණත් ඔබ නිවෙසින් එළියට එන විට බහින විට හමුවෙන්නේ බඹ ගාණක ගැඹුරු වළක් විය හැකියි. අනෙක් කාරණාව තමයි ළිඳ කැපූ පස් නිවෙස වර්ග වෙන සීමාවේ තිබීම දෝෂ ඇතිවීමට ප්‍රධාන හේතුවක් වෙනවා.
ජල නිර්ගමන වේධ දෝෂය :
නිවෙසේ ප්‍රධාන දොරටුව කෙළින් ඇළක්, දියපාරක් වැනි දෙයක් හැරී ගමන් කිරීම මෙම දෝෂයට හේතුව වෙනවා. තෙතමනය, දියසීරාව ආදිය සෙම් රෝගයන්ට අතවැනීමක්. වැසි දිනවලදී ජල ගැලීම්, ඉවුරු සෝදා යෑම් සිදුවිය හැකියි. කෙටියෙන් කියනවා නම් නිවෙසේ ධන හානි සිදුවන, ධනය රැඳෙන්නේ නැති, දේපළ - බව බෝග ආදිය විනාශයට පත්වන අශුභ පිහිටීමකි.
දේවතා වේධ දෝෂය :
ප්‍රධාන දොරට ඉදිරියෙන් හා කෙළින්ම දේව ප්‍රතිමා ආදිය තැබූ ස්ථානයක් වේ නම් මෙම දෝෂ ඇතිවෙනවා. මෙම දේවල් තැබිය යුත්තේ ඊට සුදුසු දිශාවක, ඉඩමේ සුදුසු ස්ථානයක් තෝරා ගැනීමෙන් පසුවයි. එහෙම නැත්නම් වෙන්නේ ඔබට කරදරයක්. ගෙදරින් එළියට බහින විටම ඔබ දකින්නේ යම් බාධකයක්. ගෙමිදුලේ ඉඩ ඇහිරීමක් වෙන්න පුළුවන්. මෙම ප්‍රතිමාවලට ගෞරවයක් ඇතිවන සේ ඉහත කාරණා සලකා එය වෙනත් ස්ථානයක තැබීම හෝ වාස්තු විද්‍යානුකූලව ප්‍රධාන ෙදාර වෙනස් කිරීම සිදු කළ යුතු වෙනවා.
සුසාන වේධ දෝෂය :
නිවෙසේ ප්‍රධාන දොරට ඉදිරියෙන් හා කෙළින්ම සුසාන භූමියක්, සොහොන් කොතක්, මෘත ශරීරාගාරයක්, සුසානාගාරයක් වැනි තැනක් ඇත්නම් සුසාන වේධ දෝෂයට ලක්වෙනවා. මරණය කියන්නේ අප කාට වුණත් අමිහිරි දෙයක්. නිතරම මරණයන් දැකීම, දුක් අදෝනා ආදිය ඇසීම්, පිලිස්සීමෙන් එන විස දුම නිවෙස තුළට පැමිණීමත් ඉතාම අහිතකරයි. මෙම දෝෂය හේතුවෙන් ලෙඩ දුක් ආදියට නිතරම මුහුණ දීමටත්, අකල් මරණයන් ආදියට පත්වීමත් ඉඩ ඇති බව සඳහන්. ඒ වාගේම ගෘහ මූලිකයා නිවෙසේ නොරැඳී වෙන්ව වාසය කිරීමට හෝ බොහෝ විට විදේශගතවීම්වලට මුහුණ දිය හැකියි.
කෝණ වේධ දෝෂය :
මෙය ආකාර කීපයකින් සිදුවිය හැකියි.
- නිවෙසේ ප්‍රධාන දොර, තවත් නිවෙසක බිත්තියක කොනක් වැටෙන ආකාරයට පිහිටීම.
- නිවෙසේ බිත්තියක මුල්ලක්, තවත් අසලින් පිහිටි නිවෙසක බිත්ති මුල්ලක් සමඟ එක එල්ලේ පැවතීම.
- ප්‍රධාන දොර තුන්මං හෝ හතරමං හන්දියට එක එල්ලේ පැවතීම.
මෙයින් සොර සතුරු පීඩා, අදෘශ්‍යමාන බලවේගයන්ට ලක්වීම් ආදිය සිදුවෙන බවයි පිළිගැනීම.
ද්වාර වේධ දෝෂය :
නිවෙසේ ප්‍රධාන දොරට කෙළින්ම තවත් නිවෙසක ෙදාරටුවක් පිහිටීමයි. මෙසේ නිවෙස් දෙකක දෙරටු දෙකක් එක එල්ලේ මුහුණට මුහුණලා තිබීම ඔවුන්ගේ පෞද්ගලිකත්වයට බාධාවක් වෙනවා. ඔවුනොවුන් අතර ගැටලු ඇතිවීමටත්, ඇස්වහ, කටවහ ආදියෙන් බාධාවීමත් සිදුවෙන්න පුළුවන්. පාරකින් වෙන්වුණ නිවාස දෙකකට වුණත් මෙම දෝෂය යම්තාක් පවතින්න පුළුවන්. ඒ වාගේම නිවෙසේ ප්‍රධාන දොරටුව ඉදිරියෙන්ම ගේට්ටුව පිහිටීමත් මෙම ද්වාර වේධ දෝෂයේ තවත් එක් පැත්තක්.
සිවිල් ඉන්ජිනේරු
ජේ‍යාතිෂ හා වාස්තු විද්‍යාවේදී
ගයාන් එරමුදුගොඩ
0727808809
උපුටා ගැනීම මව්බිම
