අලුත් ගෙදර හදන්න ඉඩමට යන මුල්ම දවස
සමහර විට ඔබගේ අවසරය නොගෙන ඔබගේ ඉඩමේ ඔබට යහපත් දෙයක් සිදු කිරීමට තැත් කළද ඔබ උරණ වනු ඇත. එහෙත් ඔබගේ අවසරය ලබාගෙන ඉඩමේ ඔබට කිසියම් වාසියක් සිදු නොවන දෙයක් සිදු වුවද ඔබ උරණ නොවනු ඇත. මේ තුළින් ඔබට වැටහෙන්නේ කුමක්ද? කිසියම් කටයුත්තක් සිදු කිරීමේදීද එම භූමියට හෝ දේපොළට අයිතිවාසිකම් කියන පිරිසගෙන් අවසරය ලබා ගෙන එය ඉටු කිරීම තුළින් එම කාර්යය ඉතා සාර්ථකව ඉටු කර ගත හැකි අතර එම අයිතිකරුවන්ගේ අවසරය නොගෙන කටයුතු සිදු කිරීම තුළින් සියලු කටයුතු අසාර්ථක වී ගැටුම් සිදුවන බවයි. මේ ආකාරයටම ඔබ නිවෙසක් සෑදීම සඳහා භූමි පරිහරණය කිරීමේදී එම භූමියට අයිතිවාසිකම් කියන යම් යම් පිරිස්වලින් අදාළ අවසරය ලබා ගැනීම කළ යුතුව ඇත. ඔබ මුදල් දී කිසියම් ඉඩමක් මිලදී ගත්තද එම ඉඩමේ සැබෑ අයිතිකරුවා ඔබ පමණක් නොවේ. නිත්‍යනුකූලව ඔබට හිමිකාරිත්වය තිබුණද ස්වාභාවික පද්ධතියක් හා ආධ්‍යාත්මික පද්ධතියක් තුළ ඔබත් එක් කොටස්කරුවකු පමණක් බව වටහා ගත යුතුයි. ඔබට පෙර මෙම භූමි කොටසට අයිතිවාසිකම් කියූ සිය දහස් ගණනක් මෙම භූමිය හා සම්බන්ධ වී සිටින බව දත යුතුයි. ඔබ කිසියම් ඉඩමක නිවෙසක් සෑදීම සඳහා අදහස් කළ විට එම භූමියට අදාළ නිවෙස හැදීම සඳහා අවශ්‍ය සැලැසුම් පිළියෙල කිරීම සඳහා භූමිය වෙත සැලසුම් ශිල්පියා සමඟ ඉඩමට යන මුල්ම දවස ඉතා වැදගත්. නිවෙස සඳහා අවශ්‍ය මිනුුම් කටයුතු සිදු කරනු ලබන මුල්ම දිනයේදී අවශ්‍ය වාස්තු ශිල්ප ක්‍රම නිසි ආකාරයෙන් යොදා ගැනීම තුළින් ඔබට වාසනාවන්ත ගෘහයන් ඉදිකර ගැනීමේ මූල බීජයන් භූමියේ වැපිරීම සිදු කළ හැකි අතර වාස්තු ශිල්ප ක්‍රම අනුගමනය නොකොට සිදු කරනු ලබන මූලික මිනුම් කටයුතු තුළින් ඔබට සිදුවන අවාසි වැඩිය. නව ගෘහයක් සෑදීම සඳහා ඉඩමට ප්‍රවේශ වීම මෙදින ගෘහ හිමියා ඒ සඳහා අනිවාර්යයෙන් සහභාගි විය යුතු අතර ගෘහ හිමි කාන්තාව සහ පවුලේ අනෙකුත් සාමාජිකයන්ගේ සහභාගිත්වයද වැදගත් වෙනවා. ප්‍රවේශය නිරිත දිශාව මාස පොහොය, අඟහරුවාදා, ඉරිදා යන දිනයන් හැර අනෙකුත් සුබ දිනයක රාහු කාලය පන්නා සුබ මුහුර්තයෙන් උදයේ වරුවේ ඔබගේ ඉඩමේ නිරිත දිශාවෙන් ඉඩමට ප්‍රවේශ විය යුතුයි. මෙහිදී වාස්තු ශිල්පියා සමඟ ඔහුගේ වාස්තු සජ්ජායනා මධ්‍යයේ ඊශාන දිශාව බලා දකුණු පාදය තබා ඉඩමට ප්‍රවේශ වීම මැනවි. ඉන් පසුව අනෙකුත් අයද ඉතා මෛත්‍රි සහගත සිතින් ඉඩමට ප්‍රවේශ විය යුතුයි. ගෘහ මූලිකයා ඉඩමට ප්‍රවේශයේදී ඔහු විසින් කපන ලද මුල්ම පස් කොටස රතු, සුදු රෙදිකඩකට ලබා ගෙන එය ඉඩමේ බ්‍රහ්ම පාදය මතට ගෙනයා යුතුයි. ඉන්පසු ඉඩමේ බ්‍රහ්ම පාදය මත ගෘහ හිමියා ඉඩම හා සම්බන්ධ කිරීමේ වාස්තු ශිල්පියා වතාවත් ඉටු කිරීම සිදු කළ යුතු වෙනවා. ගෘහ හිමියා හා ඉඩමේ භූමි ඥාතීන් සම්බන්ධ කිරීම ඉඩමට ප්‍රවේශ වීමේදී ලබා ගත් පස් කොටස් ඉඩමේ බ්‍රහ්ම පාදය මත හලා බ්‍රහ්ම පාදයේ ඇති පස් සමඟ හොඳින් මිශ්‍ර කොට වාස්තු සජ්ජායනා මධ්‍යයේ එම පස් කොටස් රෙදිකඩකට ලබා ගැනීම වාස්තු ශිල්පියාගේ උපදෙස් පරිදි සිදු කිරීම කළ යුතු වෙනවා. එසේම මෙහිදී ගෘහ හිමියාගේ ජන්ම නැකැත (එනම් ශක්තිය) හා සම්බන්ධ නිලයක් අල්ලා, ඉඩමේ සිටින සියලු භූමි ඥාතීන් සමඟ සම්බන්ධවී මෙම ඉඩමේ ගෘහයක් සෑදීමට යන බවත් ඒ සඳහා සියලු කොටස්වල ආශීර්වාදය ලබා දෙන ලෙසත් ඉල්ලා සිටිය යුතුවේ. මෙහිදී ගෘහ හිමියා සමඟ ඥාති කොටස් බ්‍රහ්ම පාදය ආසන්නයට පැමිණෙන අතර එම කොටස් පස් අංශ තුළ ඒකරාශී වනු ඇත. එම කොටස් ඉඩමෙන් ඉවත් කිරීම සඳහා නැවැත එම පස් කොටස් රෙදිකඩකට රැගෙන ඉඩමේ මායිමෙන් පිට තැබීම කළ යුතු අතර එම පස් කොටස් ඉඩමට පිටුපා ගලායන ජලයක පාකර හැරීම කළ යුතුවේ. මේ තුළින් සිදුවන්නේ ඉඩමේ සිටි තමන්ට අහිතවත් භූමි ඥාතීන් ඉඩමෙන් ඉවත් කිරීමේ කාර්යයි. මෙම වාස්තු ශිල්ප ක්‍රමයන් ඉටු කළ පසු ඔබට අවශ්‍ය නිවෙස සැලසුම සිදු කිරීම සඳහා අවශ්‍ය මිනුම් කටයුතු සිදු කිරීමේ හැකියාව පවතී. එහෙත් අද නිවෙසක් සෑදීමේදී මෙම කටයුතු ඉටු නොවීම නිසා මිනිසුන් බොහෝ කරදර පීඩාවලට ගොදුරු වී ඇති බව මා විසින් සිදු කරනු ලබන නිවාස පරීක්ෂාවේදී පැහැදිලි වී තිබේ. ඔබගේ නිවෙස සෑදීමේදී මූලික කටයුතු නිසි ආකාරයෙහි සිදු නොකිරීම නිසා ඔබට සිදුවිය හැකි දෝෂ පහතින් දක්වා ඇත.
- නිවෙස සෑදීම අතර මඟ නවතියි
- ස්වාභාවික උපද්‍රවවල බලපෑමට ලක්වේ.
- සේවකයන් හදිසි අනතුරුවලට ලක්වෙයි.
- ගෘහ හිමියාට එම පරිශ්‍රය පීඩාකාරී වේ.
ඉහත අයහපත් බලපෑම් සිදුවන්නේ ඔබ විසින් අවසරයකින් තොරව ඔබගේ යැයි සිතා සිටි භූමියේ ඉදිකිරීම් කටයුතු සිදු කිරීම වාස්තු උපදෙස්වලින් තොරව සිදු කළ නිසාය. මෙහිදී ඔබ විසින් විශේෂයෙන් මතක තබා ගත යුතු කාරණයක් තිබේ. ඔබගේ නව නිවෙසේ සැලසුම් සකස් කිරීම සඳහා ඉඩමට යන මුල්ම දවසේ ඔබ වාස්තු ශිල්පියාගේ සහාය ලබා ගැනීම කළ යුතුම කාර්යයක් බවයි. මේ තුළින් ඔබගේ නිවෙසේ සැලැස්ම නිසි පරිදි සකස් කර ගැනීම හා ඉදිරි කරදර බාධක කල්තියා හඳුනාගෙන ඒවාට අවශ්‍ය ප්‍රතිකර්ම කල්තියාම යෙදීමට හැකියාව ලැබෙයි. බහිරව පූජාව අතීතයේදී නිවෙසක් සෑදීමට ප්‍රථම භූමිය හා සම්බන්ධ සිදු කරනු ලබන සෑම කටයුත්තකදීම බහිරව පූජා පැවැත්වීම අපගේ අතීත මුතුන් මිත්තන් විසින් ඉටු කරනු ලැබූ මූලික කටයුත්තක් විය. එහෙත් නූතනයේදී මෙවැනි දෑ සම්බන්ධයෙන් අවධානය යොමු නොවේ. බහිරව පූජා පැවැත්වීම සිදු කරනු ලබන්නේද භූමියේ සිටින විවිධ භූමි ඥාතීන්ගෙන් අවසර ලබා ගැනීම සහ ආශීර්වාදය ලබා ගැනීම සඳහා වේ. මේ සඳහා පුලුටු වර්ග භාවිත කිරීම කිසිසේත් අවශ්‍ය නොවන අතර අවශ්‍ය වන්නේ භූමි ඥාතීන් සඳහා හතර කොන, අට කොන ආරක්ෂා කිරීම පමණි. මෙය සිදු කිරීම වඩා සුදුසු වන්නේ මුල්ගල තැබීමට පෙර දිනය වේ. මිනුම් ලබා ගැනීම ඔබගේ නිවෙස සෑදීම සඳහා අවශ්‍ය මිනුම් ලබා ගැනීමේදී පළමු මිනුම ගෘහ හිමියා සහ ගෘහ හිමි කාන්තාව විසින්ම සිදු කළ යුතු අතර මෙම කටයුත්ත ඉඩමේ ගිනිකොන කොටසේ දක්ෂිණාවෘතව සිදු කිරීමට වගබලා ගත යුතුවේ. විශේෂයෙන් මෙම මිනුම ගැනීම සිදු කරන්නේ ඉඩමේ ගිනිකොන මායිමේ සිට දකුණු දිශාවට කැරකෙන ලෙසයි. මේ සඳහා දැනට භාවිත කරනු ලබන ටේප් එක භාවිත කිරීම නොකළ යුතු අතර ගෘහ හිමියාට ගැළපෙන වඩු රියන් ප්‍රමාණය කොහු ලණුවක සලකුණු කොට එයින් මූලික මිනුම ලබා ගැනීම සිදු කරයි. ඉඩමේ සුබ අසුබ සලකුණු ඉඩමට ප්‍රවේශ වූ මුල්ම දිශාවේ ඉඩමේ දක්නට ලැබෙන සුබ අසුබ සලකුණු පිළිබඳ විශේෂ අවධානයක් යොමු කිරීම ඉතාමත් වැදගත් කාර්යයකි. ඔබගේ කාර්යය ඉතා සාර්ථක වීම සාර්ථක නොවීම පිළිබඳ ස්වභාවධර්මයේ ‘ඉඟි’ ගැන අවධානයෙන් සිටින්න.
- ඔබ බ්‍රහ්ම පාදය මත සිටි විට කුරුල්ලන් අහිංසක සතුන් හෝ සුදු පාට මල් දර්ශනය වීම මෙන්ම සිහින් වැහි පොද හා සූර්යාගේ වලාකුළු ඉවත් වී ආලෝකය පතිත වීම ඉතාමත් සුබ පෙර නිමිති වේ.
- ඔබ බ්‍රහ්ම පාදය මත සිටින විට සර්පයන්, ගුරුළන්, දරුණු සතුන්, සූර්යාලෝකය වැඩිවීම, මිනිස් හූ හඬ, සතුන්ගේ ගෙරවීම, ඇටකටු දර්ශන වීම ඉතාමත් අයහපත් පෙර නිමිති වේ.ඔබ බ්‍රහ්ම පාදයේ සිටින විට අයහපත් පෙර නිමිත් පහළ වුවහොත් ඔබගේ නිවෙස ඉදිකිරීමේදී වාස්තු ශිල්පීය ක්‍රමවල විශේෂ උපක්‍රම භාවිත කිරීම තුළින් කල්තියාම එම දෝෂ මඟ හරවා ගැනීමේ වාසිය ලැබෙනු ඇත.
වාස්තු විද්‍යා විශාරද ශාස්ත්‍රවේදී පේරාදෙණියේ ඩී.යූ. සෙනරත්උපුටා ගැනීම මව්බිම පුවත් පත
